शणै गोंयबाब कथामाळेंत अवनी, आर्या, सोहम पयले

भांगरभूंय | प्रतिनिधी

कोंकणी भाशा मंडळान राज्य पांवड्यार आयोजीत केल्ली सर्त

पणजीः कोंकणी भाशा मंडळान राज्य पांवड्यार आयोजीत केल्ले 21वे अखील गोंय शणै गोंयबाब कथामाळेंत पयली ते चवथी गटांत पेडणेंच्या हुतात्मा मनोहर पेडणेंकार सरकारी मुळावे शाळेच्या अवनी तिरोडकाराक पयलें इनाम फावो जालें. जाल्यार पांचवी ते सातवी गटांत सांखळेच्या प्रोग्रेस हायस्कुलाच्या आर्या सावंत हाका पयलें इनाम फावो जालें तेच बरोबर आठवी ते धावी गटांत वाळपयच्या अवर लेडी ऑफ लुड्स हायस्कुलाच्या सोहम वझे हाका पयलें इनाम फावो जालें.

सर्तीचोसविस्तरनिकालअसो-

पयलीतेचवथीगटः पयलें इनाम – अवनी तिरोडकार, हुतात्मा मनोहर पेडणेंकार सरकारी मुळावी शाळा, दुसरें- अनवी नायक, विद्याभुवन कोंकणी शाळा, मडगांव, तिसरें- ग्रंथा मळीक, सरकारी मुळावी शाळा, कुडणें. पयलें उमेद वाडोवपी इनाम- पलक गडेकार, हरमल पंचक्रोशी हायस्कूल, हरमल, दुसरें- मनस्वी देसाय, एस. एस. समिती मुळावी शाळा.

पांचवीतेसातवीगटः पयलें इनाम- आर्या सावंत, प्रोग्रेस हायस्कूल, सांखळी, दुसरें- श्रीअंश सुभाजी, हुतात्मा मनोहर पेडणेंकार विद्यालय, पेडणें, तिसरें- दित्या शिरवयकार, रवीन्द्र केळेकार ज्ञानमंदीर, मडगांव. पयलें उमेद वाडोवपी इनाम- श्री नार्वेकार, मुश्टीफंड हायस्कूल, कुजीरा,

दुसरें- स्वरा नायक, सर्वोदय एज्युकेशनल सोसायटी हायस्कूल, कुडचडें.

आठवीतेधावीगट

पयलें इनाम- सोहम वझे, अवर लेडी ऑफ लुड्स हायस्कूल, वाळपय, दुसरें- हर्ष नायक, जी. व्ही. एम्स. के. आर. एस. एस. हायस्कूल, तिसरें- श्रृंगी नायक, आर. पी. आर. एस. हायस्कूल, पयलें उमेद वाडोवपी इनाम- श्रेयान पागी, विवेकानंद विद्यालय, दुसरें- प्राजक्ता प्रभुदेसाय, युनियन हायस्कूल, सांगें.

इनामां वांटपाच्या सुवाळ्याक गोंय समग्र शिक्षाचे राज्य प्रकल्प संचालक डॉ. शंभू घाडी मुखेल सोयरे म्हूण हाजीर आशिल्ले तशेंच जेश्ठ साहित्यीक रामनाथ गावडे मानाचे सोयरे म्हूण हाजीर आशिल्ले. पाठ्य पुस्तिका भायर विद्यार्थ्यांनी वेगवेगळ्या कार्यावळींनी वांटेकार जावन गिन्यान मेळोवचें असो उलो डॉ. शंभू घाडी हांणी मारलो. जिवितांत येस आनी अपेस हें खिणयाळें, पूण आनंद सतत उरपाक जाय अशें तांणी मुखार म्हणलें.

भुरग्याचो भौतीक विकास जावपाक आनी विचारांक चालना दिवपाक काणयांची म्हत्वाची भुमिका आसा अशें रामनाथ गावडे हांणी म्हणलें.

निमाणें फेरयेंतल्या तीन गटांनी जाल्ले हे सर्तीचें परिक्षण वैभव कळंगूटकार, चेतन आचार्य, सोनिया गडकार, जोफा गोन्साल्वीस, प्रवेश आमोणकार, आशुतोश नायक, एेश्वर्या नायर, डॉ. प्रज्योत महाले आनी डॉ. तन्वी कामत बांबोळकार हांणी केलें. जिल्हो पांवड्यार जाल्ले सर्तींत, उत्तर गोंयचें परिक्षण वृक्षा करमली, अग्राज देसाय, रिमा सोनुर्लेंकार, दत्तू नायक, वैश्णवी हेगडे, सिद्धी काणकोणकार, विशाल नायक, संस्कृती अईर, शलका नायक हांणी, जाल्यार दक्षीण गोंय पांवड्यार सनिला साळगांवकार, सिद्धी केरकार, रोहीत भोसले, दक्षिता साळगांवकार, श्रेयश कवळेकार, शशांक नायक, प्रिती परब, विनय बोरकार आनी मन्मेश नायक हांणी केलें. हाचे भायर केंद्र पांवड्यार जाल्ले सर्तींत सुमार 150 परिक्षकांनी मंडळाक सहकार्य दिलें.

कार्यावळीचे सुरवेक कोंकणी भाशा मंडळाची अध्यक्ष अन्वेषा सिंगबाळ आनी वेगळ्यावेगळ्या विद्यालयांतल्यान आयिल्ल्या भुरग्यांनी कोंकणीचे म्हापुरूस शणै गोंयबाब हांकां फुलां ओंपून आर्गां ओंपलीं.

इनामां भेटवण सुवाळ्या वेळार अन्वेषा सिंगबाळ हांणी येवकाराचें उलोवप केलें. शणै गोंयबाब कथामाळेचे संयोजक पलाश अग्नी हांणी उपकाराचें उलोवप केलें. उक्तावण सुवाळ्याचें सुत्रसंचालन गोविंद मोपकार जाल्यार समारोप सुवाळ्याचें सुत्रसंचालन नेहा गुडे हांणी केलें.

उपांत्य आनी निमाणे फेरयेचे सर्तींत मेळून दीसभर चलिल्ले हे कार्यावळीक सुमार 700 लोक हाजीर आशिल्ले. श्री कामाक्षी आई स्पोर्टस अॅण्ड कल्चरल क्लब, जे. सी. आय, सांगें, गार्डीयन एंजेल उच्च माध्यमीक विद्यालय, आविश्कार, काणकोण, अंत्रुज घुडयो, बांदोडें, श्री कटमगाळ दादा पंगड, सी. ई. एस महाविद्यालय, कुंकळ्ळे, सरकारी म्हाविद्यालय, केपें, साहित्य मंथन, सत्तरी, रोझरी महाविद्यालय, नावेली, साश्ट, आघाज- रायजींग ऑफ यूथ, संत सोयरोबानाथ अंबिये सरकारी महाविद्यालय, पेडणें, गोंय विद्यापीठ, ताळगांव, रोटरॅक्ट क्लब, म्हापशें आनी सेंट झेवियर्स महाविद्यालय, म्हापशें ह्या संस्थांनी गोंयच्या वेगळ्यावेगळ्या केंद्रांनी सर्त आयोजीत करपाक आदार दिलो. हीसर्त येसस्वी करपाक वेगळ्यावेगळ्या संस्थांच्या तरणाट्यांनी आनी कार्यकर्त्यांनी मंडळाक भोव मोलादीक सहकार्य दिलें.