भांगरभूंय | प्रतिनिधी
पुणे, खबरां संस्था: पुण्यांतल्या वैष्णवी शशांक हगवणे हुंडोबळी प्रकरणांत धक्को दिवपी म्हायती मुखार आयल्या. वैष्णवीचो पोस्टमार्टम रिपोर्ट आयिल्ल्यान तातूंत जायत्यो गजाली उक्तडार आयल्यात.
वैष्णवीन आत्महत्या केल्ली तेन्नाय तिचो शरिरीक छळ जाल्ल्याची म्हायती मेळ्ळ्या. ताच्या आंगार वट्ट २९ खुणो आसात. हातुंतल्यो पांच ते स ताज्यो. हाका लागून आत्महत्त्येच्या दिसा मेरेन हगवणे कुटुंबान तिचो छळ केल्ल्याचें मुखार आयलां.
शारिरीक आनी मानसीक त्रासाक उबगून वैष्णवीन घरांत गोळ घेवन आत्महत्त्या केल्ली. हे विशीं तिचो घोव शशांक हगवणे, माय लता हगवणे, नणंद करिष्मा हगवणे दोशी आसात, अशें दिसून तशेंच देर आनी मांवाकूय अटक केल्या. ह्या सगल्यांक पुलीस बंदखण दिल्या. सुरवातेकूच वैष्णवीचो घोव, माय आनी नण्डेक पुलिसांनी अटक केल्ली. जाल्यार माव आनी देर हे दोगूय १७ मे सावन फरारी आशिल्ले. २२ मेक पुलिसांक तांणी अटक केली.
मजत करपी पांच जाणांक अटक
आरोपी राजेंद्र आनी सुशील हगवणे हे १७ ते २२ मे हे पांच दीस लिपून राविल्ले. ह्या काळांत तांकां आश्रय आनी मजत करपी पांच जाणां आड पुलिसांनी कारवाय करीत तांकां अटक केली. गुन्यांव दाखल जाले उपरांत पुणेंच्यान पळून गेल्ल्या ह्या दोगांकूय सुरक्षित सुवातेर दवरपाक ह्या आरोपींनी मदत केल्ली.
आरोपीं मदीं मंत्र्यांचे भुरगे
मोहन उर्फ बंदू उत्तम भेगडे (६०, रा. वडगाव मावळ), बंदू लक्ष्मण फाटक (५५, रा. लोणावळा), अमोल विजय जाधव (३५, रा. पुसगाव, ता. खटाव, जि. सातारा), राहुल दशरथ जाधव (४५, रा. पुसगाव, ता. खटाव, जि. सातारा), प्रितम वीरकुमार पाटील (४७, रा. कोगनोळी, ता. चिकोडी, जि. बेळगाव, कर्नाटक) अशी आरोपींचीं नांवां आसात. प्रितम हे कर्नाटकांतले कॉंग्रेसीचे ज्येशठ फुडारी आनी आदले मंत्री वीरकुमार पाटील हांचे पूत. वीरकुमार सेगीत २८ वर्सां आमदार आशिल्ले. ते ऊर्जा मंत्रीय आशिल्ले.
मोहन भेगडे हो हगवणेंचो इश्ट. मोहन बंडू फाटक हो पवना डॅम लागसारच्या फार्म हावसाचो धनी. अमोल जाधव आनी राहुल जाधव हांणी सातारा जिल्ह्यांतल्या पुसेगांवांत हगवणे बापूय- पुताक फार्म हावजाचेर लिपयिल्ले. जाल्यार प्रितम वीरकुमार पाटील हांणी कर्नाटकांतल्या कोगनोळी हांगा तांकां दवरिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
