वेळसांवां रेल्वेचें काम परतून आडायलें

भांगरभूंय | प्रतिनिधी

परवानगे बगर खाजगी जमनींत सर्व्हेक्षणः रस्त्याचेर देंवपाची थळाव्या लोकांची शिटकावणी

भांगरभूंय । प्रतिनिधी

मुरगांवः कसलीच परवानगी घेनासतना, कागदपत्रां नासतसना वेळसांवच्या एका भाटकाराचे जमनींत रेल विकास निगम लिमिटेडाच्या कंत्राटदारान सुरू केल्लें काम गोंयचो एकवोट संघटणेन आनी थळाव्या लोकांनी बंद उडयलें. रेल विकास निगम लिमिटेडान खाजगी जमनींत आपलें बांदकाम उबारपाचो वावर बंद केल्यार गांवच्या लोकांक रस्त्यार देंवचें पडटले, अशी शिटकावणी थळाव्या लोकांनी तशेंच गोंयचो एकवोट संघटणेन दिल्या.

वेळसांव गांवांतल्यान रेल्वे दोट्टी मार्ग व्हरपाक गांवच्या लोकांचो विरोध आसा. रेल्वे मार्गाचे कुशीक आशिल्ली जमीन खाजगी आसा. ताचेर दक्षीण पश्चीम रेल्वेचो कसलोच अधिकार ना, असो दावो गांवच्या लोकांनी केला. हे संबंदांतलो वाद न्यायालयांत प्रलंबीत आसा. मात, रेल विकास निगम लिमिटेडाच्या कंत्राटदारा वतीन रेल्वे मार्गा कुशीचे जमनींत बांदकाम करपाचो यत्न चलता. दर खेपे गांवचे लोक एकवटींतपणान तांचो हो यत्न येसस्वी जावपाक दिनात.

शेनवारा 10 ऑक्टोबराक लेगीत रेल विकास निगम लिमिटेडाच्या कंत्राटदारान रेल्वे मार्गा कुशीक आशिल्ले वेळसांवचे खाजगी जमनींत अतिक्रमण केलें. ह्या वेळार वेळसांव पाले वाठारांत तणाव निर्माण जालो. रेल विकास निगम कर्मचारी वेळसांव लेव्हल क्रॉसिंगाचेर देंवले आनी खाजगी मालमत्तेंत अतिक्रमण करून ह्या वाठारांत जमीन सर्व्हेक्षण केलें. गोंयचो एकवोट संघटणेच्या वांगड्यां सयत आयिल्ल्या थळाव्या लोकांनी रेल विकास निगमाच्या कर्मचाऱ्यांक सर्व्हेक्षण कित्या खातीर करतात, असो प्रस्न विचारलो. तशेंच वेळसांवची सरपंच मारिया डायना हांणी गांवांतल्या सर्व्हेक्षणा विशीं थळावे पंचायतीक कित्याक सुचोवणी दिवंक ना, असो प्रस्न केलो.

रेल्वे कायदो हेर सगळ्या कायद्यां परस व्हड आशिल्ल्याचें कर्मचाऱ्यांनी जाप दिताच सरपंचान खर हरकत घेतली. रेल विकास निगम जवानांनी रेल्वे दोट्टी मार्गा खातीर त्या वाठाराचें सर्व्हेक्षण करपाक आयिल्ल्याचें मान्य केलें.

ह्या कामाचेर गांवच्या लोकांनी तिडक उक्तायली. हे आदींय रेल विकास निगमान एका भाटकाराचे जमनींतले माड मारिल्ले. जंक्शन बॉक्स उबारचे आदी संबंदीत भाटकाराक कसलीच पुर्वसुचोवणी दिनासतना वा परवानगी घेनासतना थंय काम सुरू केल्लें, अशें गोंयचो एकवट संघटणेचे संस्थापक वांगडी ऑरवील दौरादो हांणी सांगलें.

गोंयकारांनी मुखार सरचें: ऑरवील दौरादो

रेल विकास निगम सध्याच्या रेल्वे मार्गाच्या दोनूय वटांतल्या जमनीचेर बेकायदो दावो करता. ही जमीन पुर्वजांनी गांवच्या लोकांक घरा कडेन येवपा- वचपाक दवरल्या. पंचायत राज कायदो 1994 प्रमाण पंचायतींक मेळिल्ल्या अधिकारा वरवीं गोंयकारांनी फुडें सरून तांच्या दायजाची राखण करची, असो उलो ऑरवील दौरादो हांणी मारला. गोंयकारांनी आतांच पावल उखल्लें ना जाल्यार कोळशाच्या प्रदुशणाक लागून गांवगिऱ्या वाठारांत रावपी आमकां काळखी फुडाराक फुडो करचो पडटलो, अशेंय तांणी सांगलें.