भांगरभूंय | प्रतिनिधी
आदले वीज मंत्री आनी विद्यमान पंचायत मंत्री माविन गुदिन्हो हे मुखेल आरोपी आशिल्ल्या साडे पांच कोटी रुपयांच्या वीज बील घोटाळो प्रकरणाची सुनावणी अतिरिक्त सत्र न्यायाधीश व्हिन्सेंट डिसिल्व्हा हांणी 21 जून मेरेन तहकूब केल्या.
ह्या घोटाळ्यांत हात आशिल्ले एके कंपनीच्या अधिकाऱ्यान आपणा वयलो खटलो रद्द करचो हे खातीर अर्ज केला. ह्या अर्जाचेर जून म्हयन्यांत युक्तीवाद जातलो. ह्या खटल्यांतल्यान आपणाक वगळावचो हे खातीर माविन गुदिन्हो हांणी अर्ज केला.
काॅंग्रेस सरकारांत वीज मंत्री आसतना गुदिन्हो हांणी गोंयांत कारखाने येवचे हे खातीर तांकां कांय प्रमाणांत लायटीचीं बिलां माफ केल्लीं.
ही येवजण सोंपले उपरांत वीज खात्याच्या कांय कर्मचाऱ्यांक हाताक धरून वीज बिलां माफ करून सरकाराचें सुमार साडे पांच कोटी रुपयांचें लुकसाण केल्ल्याचो आरोप ह्या प्रकरणाचो तपास करपी क्रायम ब्रॅंचीन केल्लो आनी गुदिन्हो आनी हेरांचेर भ्रश्टाचार प्रतिबंधक कायद्या खाला गुन्यांव नोंद केल्लो. ह्या प्रकरणाची दक्षीण गोंय सत्र न्यायालयांत सुनावणी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
