भांगरभूंय | प्रतिनिधी
मायकल लोबाेः मुख्यमंत्र्यान हस्तक्षेप करपाची गरज
पणजी : सरकारांतल्या एका मंत्र्यान विरोधी पक्ष फुडाऱ्याक लक्ष्य करप लोकशायेंत योग्य न्हय. मुख्यमंत्री डॉ. प्रमोद सावंत हांणी ह्या प्रस्नांत हस्तक्षेप करपाची गरज आसा, अशें विरोधी पक्ष फुडारी मायकल लोबो हांणी म्हणलां. काँग्रेस विधीमंडळ पंगडाचे बसके उपरांत ते उलयताले. दोन रिसॉर्टा विशींची कारणां दाखय नोटीस आपणाक अजून मेळूंक ना, अशेंय तांणी सांगलें.
नगरनियोजन मंत्री विश्वजीत राणे आनी विरोधी पक्ष फुडारी मायकल लोबो हांचे मदलो वाद सध्या तेंगशेर पावला. लोबो हांच्या ‘बाका डेक’ आनी ‘नाझरी रिसॉर्ट’ ह्या रिसॉर्टांक नगरनियोजन खात्यान कारणां दाखय नोटीस जारी केल्या. तशेंच हे नोटिशेक सारक्यो जापो दिल्यो ना जाल्यार रिसॉर्टां मोडपाची शिटकावणी नगरनियोजन मंत्र्यान दिल्या. हाका लागून ह्या प्रकरणान गंभीर स्वरूप घेतलां. बेकायदाे जमीन रूपांतरणां तशेंच बांदकामां करप्यांचेर कायद्या प्रमाण कारवाय जातली, अशें नगरनियोजन मंत्र्यान सांगलें. नगरनियोजन मंडळाची बिरेस्तारा बसका जाली. ‘नाझरी रिसॉर्ट’ आनी बागा डेक ह्या दोनूय रिसॉर्टांक कारणां दाखय नोटीस जारी केल्ल्याची म्हायती मंत्री राणे हांणी पत्रकारां कडेन उलयतना दिल्या.
शुक्रारा सांजे काँग्रेस विधीमंडळ पंगडाची बसका जाली. आमदार आलेक्स सिक्वेरा सोडून हेर सगले आमदार बसकेक हाजीर आशिल्ले.
आपणाक कारणां दाखय नोटीस आपणाक मेळूंक ना. ती मेळ्ळे उपरातं आपूण जाप दितलो. रिसॉर्टांची सगलीं कागदपत्रां कायदेशीर आसात. ही दोनूय रिसॉर्टां आपूण आमदार जावचे पयलीं सावन आसात. 2007 वर्सा ह्या रिसॉर्टांचें बांदकाम जालां, अशें लोबो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
