भांगरभूंय | प्रतिनिधी
अधिवेशन सोंपले उपरांत जातली निवडः पाटकार
भांगरभूंय I प्रतिनिधी
पणजी : मायकल लोबो हांकां विरोधी पक्ष फुडारीपदा वयल्यान काडले उपरांत 10 दीस जाले. अजुनूय काँग्रेसीन नव्या विरोधी पक्ष फुडाऱ्याचें नांव जाहीर करूंक ना. विधानसभा अधिवेशन सोंपले उपरांत नव्या विरोधी पक्ष फुडाऱ्याची निवड जातली, अशें काँग्रेस प्रदेशाध्यक्ष अमीत पाटकार हांणी सांगलें.
विधानसभा अधिवेशनाच्या आदल्या दिसा काँग्रेसीचे आठ आमदार भाजपांत प्रवेश करपाचे आसात, अशी चर्चा सुरू जाल्ली. ताका लागून प्रभारी दिनेश गुंडू राव हांणी गोंयांत येवन काँग्रेस आमदारांची बसका घेतली. सगल्या आमदारां कडेन चर्चा केले उपरांत मायकल लोबो आनी दिगंबर कामत हांचेर पक्षविरोधी कारवायो केल्ल्याचो आरोप दवरून प्रदेश काँग्रेसीन ह्या दोगां आड अपात्रता याचिका दाखल करून मायकल लोबो हांकां विरोधी पक्ष फुडारीपदा वयल्यान काडले. ते उपरांत विरोधी पक्ष फुडारी दोन दिसांत थारतलो अशें काँग्रेस प्रदेशाध्यक्ष अमीत पाटकार हांणी सांगिल्लें.
पूण अधिवेशन सोंपपाक फक्त तीन दीस उरल्यात, अजुनूय विरोधी पक्ष फुडारी थारूंक ना. ते भायर लोबो आडचे अपात्रताय याचिकेचेर सभापतींनी निर्णय दिवंक ना. ताका लागून सध्याचे स्थितींत विधानसभेंत मायकल लोबो हेच विरोधी पक्ष फुडाऱ्याची भुमिका घेतात.
मजगतीं, विरोधी पक्ष फुडारीपदा खातीर सध्या हळदोणेंचे आमदार कार्लुस फेरेरा आनी मुरगांवचे आमदार संकल्प आमोणकार हांची नांवां चर्चेत आसून, अधिवेशन सोंपले उपरांत एकल्याच्या नांवार म्होर बसतली, अशी म्हायती काँग्रेसींतल्या सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
