भांगरभूंय | प्रतिनिधी
खबरां संस्था
मेलबर्नः टी-20 वर्ल्ड कप सर्तींत भारत आनी पाकिस्तान हांचे मदीं आयताराक मेलबर्नांत म्हालडत जाली. निमण्या बॉला मेरेन रंगल्ले हे मॅचींत भारतान पाकिस्तानाचेर 4 विकेटी राखून जैत मेळोवन वर्ल्ड कपांत आपले कामगिरी दमदार सुरवात केली. विराट कोहलीन 53 बॉलांत 82 धांवड्यो करून भारतीयांक दिवाळेची भेट दिली. ताका मॅन ऑफ दी मॅच पुरस्कार फावो जालो. पाकिस्तानाच्या 160 धांवड्यांचो फाटलाव करपा खातीर मैदानार आय़िल्ल्या भारतीय पंगडाची सुरवात बाबत जाली. भारताचो दोनूय ओपनर दरेकी 4 धांवड्यो करून परत आयले. नसीम शाहान केएल राहुलाची जाल्यार हारिस रौऊफान कॅप्टन रोहीत शर्माची विकेटी घेतली.
रोहीत- राहुल बाद जाले उपरांत आयिल्ल्या सूर्यकुमार यादवान पयल्याच बॉलाचेर चौको मारून सुरवात नेटान केली. मात 10 बॉलांत 15 धांवड्यो केल्या उपरांत हारिस रौऊफाच्या फास्ट बॉलांचेर ताचो अदमास चुकलो. सूर्यकुमार आवट जाल्या उपरांत दावखुऱ्या अक्षर पटेलाक शादाब खान, नवाझा आड धांवड्यांची गती वाडोवपा खातीर बडटी दिवन पांचव्या नंबराचेर खेळपाक धाडलें. मात तो फकत 2 धांवड्यो करून बाद जालो. ताच्या उपरांत विराट कोहलीन मॅचींची सूत्रां आपल्या हातांत घेतलीं. ताणे 82 धांवड्यो करतना 6 चौके मारून 4 सके हुबयले. हार्दिक पंड्यान 37 बॉलांत 40 धांवड्यो करून ताका जाय तसो वांगोड दिलो. हार्दिकान 1 चौको आनी 2 सके मारले.
विराट आनी हार्दिक पंड्या, तशेंच सूर्यकुमार सोडल्यार भारताच्या हेर बॅट्समनांक दोन आंकडी धांवड्यो करप शक्य जालें ना. रौफ आनी मोहम्मद नवाजान दरेकी दोन विकेटी घेतल्यो. रोहीत (4), केएल राहुल (4), अक्षर पटेल (2), दिनेश कार्तिक (1) आनी रवींचंद्रन आश्विनान (1) हजेरी लावन आयले. भारताच्या 160 धांवड्यांत एक्स्ट्रा 11 धांवड्यांचो आसपाव आसा.
भारताचो कॅप्टन रोहीत शर्मान टॉस जिखून फयली बॉलींग करपाचो निर्णय घेतलो. अर्शदीप सिंगान पयलेच ओव्हरींत पाकिस्तानाचो कॅप्टन बाबर आझमान शून्याचेर
एलबीडब्ल्यू करून रोहिताचो निर्णय सारको आशिल्ल्याचें दाखोवन दिलें. ते उपरांत दुसरे ओव्हरींत ताणे पाकिस्तानाचो स्टार बॅट्समन मोहम्मद रिजवानाक भुवनेश्वर कुमाराच्या हातांत कॅच दिवपाक लायली आनी 2 बाद 15 अशी पाकिस्तानाची स्थिती केली. शान मसूद (नाबाद 52) आनी इप्तिकार अहमद हांणी डाव साल्वार केलो. तांणी तिसरे विकेटी खातीर 76 धांवड्यांची भागिदारी केली. मोहम्मद शमीन इफ्तिकाराक एलबाडब्ल्यू करून ही जोडी फोडली. ताणे 34 बॉलांत 51 धांवड्यो केल्यो. तातूंत 2 चौके आनी 4 सके आशिल्ले.
अर्शदीप सिंग आनी भारताचो अश्टतासी खेळगडो हार्दिक पंड्यान दरेकी तीन तीन विकेटी घेवन भारताक ही म्हत्वाची मॅच जिखपाची संद मेळोवन दिली. अर्शदीपान बाबर (0), रिजवान (4) आनी असिफ अलीक (2) हांका बाद केलें. शदाब खान (5), हैदर अली (2) आनी नवाज (9) हे हार्दिकाचे बळी थारले. शमी आनी भुवनेश्वर कुमारान दरेकी एक विकेट घेतली. निमाणे पांच ओव्हरींत धांवड्यांची गती आडावपाक भारतीय बॉलरांक अजून येश येना ही गजाल हे मॅचींत परत एक फावट सामकार आयली. ताचे कडेन भारतीय टीम वेवस्थापकांक गंभीरपणान लक्ष दिवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
