भांगरभूंय | प्रतिनिधी
खबरां संस्था
लंडनः विम्बल्डनाच्या ग्रास कोर्टाचेर आपलें अधिराज्य आशिल्ल्याचें सिद्ध करपी सर्बियाच्या नोव्हाक जोकोविचान ऑस्ट्रेलियेच्या निक किर्गिओसाक 4-6, 6-3, 6-4, 7-6 (7-3) अशें हारोवन दादल्यांचें एकोडीचें वस्तादपण मेळयलें. जोकोविचाचें हें सातवें विम्बल्डन जेतेंपद आनी 21वे ग्रँडस्लॅम थारलें
आपली पयलींच ग्रँडस्लॅम फायनल खेळपी किर्गिओसान जोकोविचाक तोडीस तोड टक्कर दिली. सुरवातीचो सेट जिखून निकान आघाडी घेतिल्ली. मात ते उपरांत जोकोविचान ताका वरचड जावपाक दिलें ना. चवथ्या सेटांत मॅच टायब्रेकरांत गेली. थंय जोकोविचान 6-1 अशी आघाडी घेतली. 21 फावट ग्रँडस्लॅम जिखपी जोकोविचा सामकार आनी फकत राफेल नादाल आसा. ताणे आतां मेरेन 22 गँडस्लॅम जिखल्यांत.
1968 सावन ओपर एरानांत सगल्यांत चड विम्बल्डन जिखपाक जोकोविच दुसरे सुवातेर पावला. स्वित्झर्लंडचो रॉजर फेडरर तांच्या फुडें आसा. फेडररान आठ फावट विम्बल्डन जिखलां. सात फावट विम्बल्डन जिखपी जोकोविचान अमेरिकेच्या पीट सॅम्प्रासा कडेन बोरोबोरी केल्या.
हाचे पयलीं जोकिविच आनी किर्गिओस दोन फावट सामकार आयिल्ले. आनी ह्यो दोनूय मॅची किर्गिओसान जिखल्ल्यो. तांची पयली मॅच 2017 वर्सा अकापुल्को मेक्सिको सर्तीत उपांत्यपूर्व फेरींत जाल्ली. एटीपी मास्टर्स सर्तींत जोकोविचाक ताणे हारयल्लें. मात विम्बल्डनांत जोकोविचान आपलो पुराय अणभव पणाक लावून जैत मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
