भांगरभूंय | प्रतिनिधी
खबरां संस्था
लंडनः फ्रेंच टेनीस सर्तीची वस्ताद इगा श्वीऑनटेक आनी उप जैतिवंत कोको गॉफाचें विम्बल्डन टेनीस सर्तींत बायलांचे एकोडींतले आव्हान तिसरे फेरयतूच सोंपलें. दादल्यांच्या गटांत टेलर फ्रिट्झ, अॅलेक्स डी मिनाऊर हांणी फुडले फेरयेंत प्रवेश केलो. जाल्यार बायलांचे एकोडीत सिमोना हालेप, अमँडा अनिसिमोव्ह, एलिझे कॉर्नेट हांणी जैत मेळयलें.
पोलंडाच्याा टॉप सिडेड श्वीऑनटेकान फ्रान्साच्या बीन सिडेड कॉर्नेटा कडल्यान 4-6, 2-6 अशी हाऱ घेतली. श्वीऑनटेक वस्तादपणाची दावेदार अशें समजतालें, मात कॉर्नेटान सेगीत 37 मॅचींतली तिगेली जैताची माळ तोडली. अमेरिकेच्या 20वी सिडेड अनिसिमोव्हान सुरवेक फाटीं पडून लेगीत गॉफाक 6-7, (4-7), 6-2, 6-1 अशें हारोवन आनीक एका अजापाच्या निकालाची नोंद केली. रोमानियाच्या आदली विम्बल्डन जैतिवंत हालेपान पोलंडाच्या मॅग्दालेना फ्रेचराचेर 6-4, 6-1 अशें सरळ सेटांनी जैत मेळयलें. जाल्यार फ्रान्साच्या हार्मनी टॅनान ब्रिटनाच्या कॅटी बाऊल्टराक 6-1, 6-1 अशें सहज हारयलें. क्रोएशियाचे पेट्रा मार्टिचनान 8वी सिडेड अमेरिकेच्या जेसिका पेगुलाचेर 6-2, 7-6 (7-5) अशें जैत मेळयलें.
दादल्यांचे एकोडीत अमेरिकेच्या फ्रिट्झान स्लोव्हाकियाच्या अँलेक्स मोल्कानाचेर 6-4, 6-1, 7-6 अशें जैत मेळयलें. ऑस्ट्रेलियेच्या मिनाऊरान ब्रिटनाच्या लिआम ब्रॉडीक 6-3, 6-4, 7-5 अशे हारोवन दुसरे फेरयेंत प्रवेश केलो. अमेरिकेच्या ब्रँडन नाकाशिमान कोलंबियाच्या डॅनियल गलानाचेर 6-4, 6-4, 6-1 अशी मात केली. जाल्यार ऑस्ट्रेलियेच्या बीन सिडेड जेसन कुबलेरान चुरशीचे लडतींत अमेरिकेच्या जॅक सॉकाचेर 6-2, 4-6, 5-7, 7-6, 6-3 अशें जैत मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
