भांगरभूंय | प्रतिनिधी
-मुख्यमंत्रीः ‘विज्ञान धारा’ कार्यावळी वरवीं विद्यार्थ्यांक मेळटलें मागदर्शन
पणजी: विद्यार्थ्यां मदीं विज्ञान, गणीत, अभियांत्रीकी अशा विशयांची आवड निर्माण जावची, हे खातीर राज्यभरांत 500 व्याख्यानां घेतले. मुख्यमंत्री डॉ. प्रमोद सावंत हांणी ही घोशणा केली. बिरेस्तारा ‘विज्ञान धार 2024’ कार्यावळीच्या उक्तावणा वेळार ते उलयताले. ह्या वेळार शिक्षण खात्याचे सचीव प्रसाद लोलयेंकार, उच्च शिक्षण संचालनालयाचे संचालक भूषण सावयकार आनी हेर अधिकारी हाजीर आशिल्ले.
विज्ञान धारा हे कार्यावळी वरवीं विद्यापिठांत अभियांत्रीकी वा वैजकी म्हाविद्यालयांत शिकोवपी प्राध्यापक शाळा आनी उच्च शिक्षण संस्थेंत वचून थंयच्या विद्यार्थ्यांक मार्गदशन करतले. तशेंच राष्ट्रीय संशोधन संस्थेंत काम करपी शास्त्रज्ञ शाळा तशेंच म्हाविद्यालयांतल्या विद्यार्थ्यांक मार्गदर्शन करतले. राज्यभरांतल्या सुमार 75 हजार विद्यार्थ्यांक फायदो जातलो. ही कार्यावळ 12 जानेवारी ते 28 फेब्रुवारी मजगतीं, जातली, अशें मुख्यमंत्र्यांनी सांगलें.
कांय विद्यार्थ्यांच्या मनांत विज्ञान, गणित सारक्या विशया विशीं भिरांत आसता, हे विशय कठीण आशिल्ल्यान इत्सा आसुनूय जायत्या जाणांक वैजकी वा अभियांत्रीकी अभ्यासक्रमांत वांटो घेवपाक मेळना. ही भिरांत पयस करपा खातीर विज्ञान धारा ही कार्यावळ उपेगी थारतली. हाका लागून शाळकरी भुरग्यां मदीं विज्ञानीक दिश्टीकोण तयार जावपाक मजत जातली. कार्यावळीक लागून विद्यार्थी आनी विज्ञान हातूंतले अंतर उणें करप शक्य आसा, अशें मुख्यमंत्री डॉ. सावंत हांणी म्हणलें.
दरेक म्हालातं स्टेम प्रयोगशाळा
हरवळ्या प्राथमीक शाळेंत हालींच स्टेम प्रयोगशाळा उक्तीं केल्या. हे वरवीं, विज्ञान, तंत्रज्ञान, अभियांत्रीकी आनी गणीत हे विशय सोंपे करून सांगतात. कांय काळांत दरेक म्हालांतल्या एके शाळेंत अशी स्टेम प्रयोगशाळा उबारपाचो आमी यत्न करतले, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
