भांगरभूंय | प्रतिनिधी
पणजीः विदेशांत नोकरी दिवपाचें हांयस दाखोवन लोकांक फटोवपी 13 बोगस दलाल गोंयांत वावुरतात. परराष्ट्र राज्यमंत्री व्ही. मुरलीधरन हांणी राज्यसभेंतल्या लेखी प्रस्नाक दिल्ले जापेंतल्यान ही म्हायती मुखार आयल्या.
विदेशांत नोकरी दिवपाचें हांयस दाखोवन लोकांक लाखांनी रुपयांक तोपी घालपी खूबशे दलाल गोंया सयत देशभरांत वावुरतात. गोंयांत अशे बेकायदो वेवसाय करपी 13 दलाल आशिल्ल्याचें मुरलीधरन हांणी जापेंत म्हणलां.
बेकायदो अशे तरेचे वेवसाय करून लोकांची फटवणूक करपी 2,925 दलाल देशभरांत वावुरतात. अशे सगळ्यांत चड दलाल आंध्र प्रदेशांत (471) आसात. ते उपरांत उत्तर प्रदेश (400), तामीळनाडू (360), महाराष्ट्र (309) आनी दिल्ली (292) ह्या राज्यांचो नंबर लागता, अशें मंत्री मुरलीधरन हांणी जापेंत सादर केल्ले आंकडेवारींतल्यान दिसता. गोंयकारांक विदेशांत नोकरेचें हांयस दाखोवन तांची लाखांनी रुपयांची फटवणूक जावपाच्यो घडणुको खूब खेपे उजवाडाक आयल्यात. हो विशय कांय वर्सां आदीं मुख्यमंत्री डॉ. प्रमोद सावंत हांचे मेरेन पाविल्लो. त्या वेलार मुख्यमंत्र्यान लेगीत अश्या बोगस दलालां पासून सादूर रावपाचो लोकांक उलो मारिल्लो. पूण ते उपरांत लेगीत अश्या हांयसाक खूब जाण बळी पडिल्ल्याचें चित्र गोंयांत दिसलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
