भांगरभूंय | प्रतिनिधी
उत्सव समितीः कोरोना विशींच्या मार्गदर्शक तत्वांक, भलायकी नेमांक पाळो दितले
भांगरभूंय । प्रतिनिधी
मुरगांवः वास्कोचो वर्सुकी श्री दामोदर भजन सप्ता 3 आनी 4 ऑगस्टाक मनयतले. ह्या उत्सवांत कोरोना म्हामारी विशींच्या मार्गदर्शक तत्वां वांगडाच भलायकी नेमांक पाळो दितले, अशें श्री दामोदर भजन सप्ता उत्सव समिती वरवीं पत्रकार परिशदेंत सांगलें.
पत्रकार परिशदेक केंद्रीय समितीचे अध्यक्ष प्रशांत जोशी, श्री दामोदर भजन सप्ता समिती उत्सव समितीचे अध्यक्ष कृष्णा सोनुर्लेकार, उपाध्यक्ष शेखर खडपकार, सचीव संतोश खोर्जुवेंकार, भांडारी विष्णू गारुडी, वांगडी विनायक घोंगे, रघुनाथ खोबरेकार, आत्माराम नार्वेंकार हाजीर आशिल्ले.
उत्सव समिती कोरोना म्हामारी विशींच्या सगळ्या मार्गदर्शक तत्वांक तशेंच भलायकी नेमांक पाळो दितली. उत्सवा वेळार कसलोच वायट प्रकार घडचो न्हय हे खातीर देवळाच्या वाठारांत खर पुलीस बंदोबस्त दवरतले, अशीय म्हायती पत्रकार परिशदेंत दिली.
प्रशांत जोशी हांणी सांगलें, अंदूंचो उत्सव भौशीक तरेन मनयतले. 3 ऑगस्टाक दामोदर भजन सप्ताच्या दिसा सकाळीं 11 ते दनपारां 2 वरां मेरेन भाविकांक देवाचें दर्शन घेवपाक मेळचें ना. कारण अजून लेगीत कोरोना बादीत मेळत आसात. ताका लागून केंद्रीय आनी उत्सव समितीन हो निर्णय घेतला. दनपारां 2 उपरांत भाविकांक देवाचें दर्शन घेवपाक मेळटलें. पूण भाविकांनी कोरोना म्हामारी विशींच्या मार्गदर्शक तत्वांक पाळो दिवचो, अशी विनवणी जोशी हांणी केली.
संतोष खोर्जुवेंकार हांणी सांगलें, अंदूंच्या सप्ता उत्सवांत पार समित्यांक पुराणीक पार करपा खातीर वेळ मेळूंक ना. कांय पार समित्यो दिंडी घालीत देवळांत येतल्यो. फूल वेवसायिकांक अंदूं मंडपांत बसून फुलां विकपाक मेळचीं नात. हाची सगळ्या फूल वेवसायिकांनी नोंद घेवची. कारण पार समित्या वांगडा येवपी दिंडी कलाकारांचें मंडपांत सादरीकरण जातलें. तशेंच देवळांत पुलीस यंत्रणे वांगडाच खाजगी सुरक्षा रक्षक नेमतले. हाका सगळ्या भाविकांनी आदार करचो, असो उलो तांणी ह्या वेळार मारलो. 4 ऑगस्टाक भजन सप्ताची देवळांत समाप्ती जातली. पूण अंदूं भायल्या देवळाच्या मंडपांत गोपाळ कालो जातलो. 3 ऑगस्टाक दनपारां 12 वरांचेर 24 वरांच्या भजनाक अशोक मनोहर मांद्रेंकार हांच्या गायनान सुरवात जातली.
2 ऑगस्टाक जयतीर्थ मेहुंडी हांचें गायन
मंगळारा 2 ऑगस्टाक श्री दामोदर मंदिरा मुखार उबारिल्ल्या मंडपांत जयतीर्थ मेहुंडी (धारवाड) हांचें गायन जातलें. तांकां ऑर्गनाचेर दत्तराज सुर्लकार, पेटयेचेर दत्तराज म्हाळशी, तबल्याचेर अजिंक्य जोशी (पुणे), पखवाजाचेर प्रथमेश तारळकार (पुणे), ताळाचेर योगेश रायकार संगीत साथ दितले. बिधवारा 3 ऑगस्टाक पयली बैठक नटराज थेटरा लागसारच्या मंडपांत रातचीं 9 ते 10.30 वरां मेरेन जातली. तातूंत ह्रषिकेश बडवे हांचें गायन जातलें. तांकां पेटयेचेर दत्तराज सुर्लकार, तबल्याचेर शैलेश गांवकार, पखवाजाचेर किशोर तेली, ताळाचेर योगेश रायकार साथसंगत करतले. दुसरी बैठक टुरिस्ट टॅक्सी स्टॅण्ड जोशी चौकांत रातच्या 11 वरांचेर सुरू जातली. हे बैठकींत ह्रषिकेश बडवे गायन सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
