भांगरभूंय | प्रतिनिधी
भांगरभूंय । प्रतिनिधी
मुरगांवः तीन वर्सां आदीं लोकार्पण करून लेगीत वापराविणें पडून आशिल्ल्या कुठ्ठाळे मर्केट प्रकल्प प्रश्नाक चालना मेळपाची चिन्हां दिसपाक लागल्यांत. गोंय साधन-सुविधा उदरगत म्हामंडळाचो उपाध्यक्ष दीपक नायक, कुठ्ठाळेचो आमदार आंतोनियो वाझ हांणी मार्केटाची पळोवणी करून कितें करपाची गरज आसा हें पळयलें.
ठाणा-कुठ्ठाळी हांगा हो प्रकल्प बांदपाक 2013 वर्सा सुरवात जाल्ली. 28 जानेवारी 2019 दिसा पंचायत मंत्री माविन गुदिन्हो हांणी ताचें उक्तावण केल्लें. एक- दोन विक्रेते सोडल्यार बाकीचे विक्रेते थंय वचपाक तयार नाशिल्ल्यान सध्या तो धवो हत्ती जाला.
आमदार आंतोनियो हांणी मुख्यमंत्री डॉ प्रमोद सावंत हाचे कडेन फाटपुरवण करून ह्या प्रकल्पाचो वापर जावचो हे खातीर सध्या फुडाकार घेतला. मंगळारा सकाळीं दीपक नायक, जीएसआयडीचो वेवस्थापक ज्यूड कार्व्हालो, कुठ्ठालेची सरपंच सोनिया परेरा हांणी केल्ले पळोवणे वेळार तांकां मार्केटांत जायत्यो त्रुटी दिसून आयल्यो.
ह्या मार्केट प्रकल्पांत पुलीस स्टेशन आनी हेर सरकारी कार्यालयां व्हरतले अशी म्हायती आमदार आंतोनियो हांणी दिली. रस्त्याचे कडेन बसून माल विकपी विक्रेत्यांचें मार्केट प्रकल्पांत स्थलांतर करतले अशें सरपंच सोनिया परेरान सांगलें. सरकारी कार्यालयां आशिल्ल्यान ह्या प्रकल्पांत लोक येतले आनी विक्रेत्यांक गिरायक मेळटलें असी आस्त तिणे उक्यायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
