भांगरभूंय | प्रतिनिधी
पेडणें: वजरी सरपंच पदार समीक्षा नायक आनी उपसरपंच पदार रुपम कांबळी हांची विरोधा विणें निवड जाली. सरपंच पदाचो अनिल शेट्ये आनी उपसरपंच पदाचो रुपम कांबळी हांणी राजिनामो दिले उपरांत हीं दोनूय पदां रितीं आशिल्लीं.
हे खातीर ४ तारखेर वजरी पंचायत कार्यालयांत पंचायत मंडळाची विशेश बसका जाली. हातूंत दोनूय पदां खातीर वेंचणूक घेतली. तातूंत उपसरपंच म्हणून रुपम कांबळी हांची फेर निवड केली. जाल्यार सरपंच म्हणून समीक्षा नायक हांची निवड जाली.
वट्ट पांच पंच वांगडी आशिल्ल्या पंचायत मंडळांतले संजना परब आनी कार्तिक नायक हजर रावंक नाशिल्ल्यान सरपंच आनी उपसरपंच हांची निवड विरोधाविणें जाली.
सरपंच समीक्षा नायक हांणी, आपल्याचेर पंच वांगड्यांनी जो विस्वास दाखयलो, हाका लागून आपूण पंचायत मंडळाची पुरायेन उदरगत करपाचो यत्न करतली अशें तांणी सांगलें.
सरपंच आनी उपसरपंच ह्या दोनूय पदांचेर बायलांची निवड जाल्ल्यान हे पंचायतीचेर बायलांचें राज्य स्थापन जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
