भांगरभूंय | प्रतिनिधी
अमीत शाह हांची 16 एप्रीलाक फोंड्यां जाहीर सभा
भांगरभूंय । प्रतिनिधी
पणजीः उत्तर गोंय लोकसभा मतदारसंघांत सेगीत सवे खेपो वेंचणूक लडोपाची तयारी केंद्रीय पर्यटन राज्य मंत्री श्रीपाद नायक हांणी सुरू केल्या. आपणे भेटी गाठी घेवपाक सुरवात केल्या, अशें तांणी सांगलें. लोकसभा वेंचणुकेचे तयारीचो भाग म्हूण केंद्रीय गृह मंत्री अमीत शाह हांची 16 एप्रीलाक फोंडें म्हालांत जाहीर सभा जातली.
भारतीय जनता पार्टीचे सुकाणू समितीची बसका सोमारा पणजे जाली. मुख्यमंत्री डॉ. प्रमोद सावंत, प्रदेश अध्यक्ष सदानंद शेट तानावडे, केंद्रीय मंत्री श्रीपाद नायक बसकेक हाजीर आशिल्ले. सभापती रमेश तवडकार, चंद्रकांत कवळेंकार आनी गोविंद पर्वतकार हे बसकेक हाजीर नाशिल्ले.
अमीत शाह 16 एप्रीलाक गोंयांत
केंद्रीय गृहमंत्री अमीत शाह हे 16 एप्रीलाक गोंयांत येतात. फोंडें म्हालांत सांजे तांची जाहीर सभा जातली. सभेचे थळ निश्चीत जावंक ना. फर्मागुडी वा शिरोड्यां सभा जावपाची शक्यता आसा. जाहीर सभे सयत मुखेल कार्यकत्यांची बसका अमित शाह घेतले. प्रदेश अध्यक्ष सदानंद शेट तानावडे हांणी बसके उपरांत ही म्हायती दिली.
लोकसभेची तयारी सुरू
पक्षान पुराय देशांत लोकसभेची तयारी सुरू केल्या. केंद्रीय मंत्री श्रीपाद नायक हांणी ही म्हायती दिली. आपली उमेदवारी लेगीत निश्चीत आशिल्ल्याचें संकेत तांणी दिले. पक्षाचे संसदीय मंडळ उमेदवारांची वळेरी जाहीर करतलें. उत्तर गोंया खातीर हेर नांवांची जी चर्चा आसा, त्यो वावड्यो आसात, अशें तांणी सांगलें. श्रीपाद नायक उत्तर गोंयांतल्यान 1999 सावन सेगीत भाजपाचे उमेदवार आसा. आतां मेरेन 1999, 2004, 2009, 2014, 2019 ह्यो पांच वेंचणुको तांणी जिखल्यात. हे खेपे उत्तरेंत नव्या चेऱ्याक पक्ष उमेदवारी दितलो, अशी चर्चा आसा.
इतले मजगतीं, साखळी पालिका वेंचणुकेचे मुखेली म्हूण अध्यक्ष सदानंद शेट तानावडे हे वावर करतले. फोंडें नगरपालिका वेंचणुकेची जापसालदारी खासदार विनय तेंडुलकार हांचे कडेन दिल्या. सुकाणू समितीचे बसकेंत हो निर्णय जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
