भांगरभूंय | प्रतिनिधी
सदानंद तानावडेः गोंयांतल्यो दोनूय सुवातो जिखपाचो विस्वास
भांगरभूंय । प्रतिनिधी
मुरगांवः येता ते लोकसभा वेंचणुकेंत भाजपा गोंयांतल्यो दोनूय सुवातो जिखतली. तशेंच संसदेंत 324 चो आंकडो हुपतली, अशें भाजपा प्रदेशाध्यक्ष सदानंद शेट तानावडे हांणी सांगलें.
प्रधानमंत्री नरेंद्र मोदी सरकाराचीं 8 वर्सां पुराय जाल्ल्या निमतान गरीब कल्याण संमेलन म्हासभेंत तानावडे उलयताले. भाजपा वास्को मंडळान ही म्हासभा वास्कोच्या रेल्वे कम्युनिटी हॉलांत आयोजीत केल्ली. ह्या वेळार तांचे वांगडा मंत्री मॉवीन गुदिन्हो, आमदार कृष्णा साळकार हांचे सयत वास्को भाजपा मंडळ अध्यक्ष दीपक नायक, बायणा रवींद्र भवनाचे अध्यक्ष जयंत जाधव, नगरसेविका शमी साळकार, भाजयुमो गोवा उपाध्यक्ष रिमा सोनुर्लेकार, कार्यकारिणी वांगडी किरण नायक, महिला मोर्चा कार्यकारिणी वांगडी सुप्रिया नायक, प्रतिमा कोरगांवकार, भाजपा महिला मोर्चा अध्यक्ष पुजा नायक, युवा मोर्चा अध्यक्ष गौरीश नायक, अल्पसंख्याक मोर्चा वास्को अध्यक्ष वाहीद शेख, जिल्हो पंचायत वांगडी अनिता थोरात आनी हेर मानेस्त हाजीर आशिल्ले. तांचे हस्तुकीं दिवली पेटोवन म्हासभेचें उक्तावण जालें.
मंत्री गुदिन्हो हांच्या फुडारपणा खाला शार गरीब संकल्पने खाला गोंयभर विवीध कार्यावळी चालीक लायतले. तातूंत केंद्र सरकाराच्यो साबार येवजण्यो लोकां मेरेन पावयतले. गोंयकारांनी भाजपाक जिल्हो पंचायत, पंचायत आनी हालींच विधानसभा वेंचणुकांनी भाजपाक भोवमत दिलां. हाचे वयल्यान उत्तर आनी दक्षीण गोंयांतल्यो खासदारांच्यो सुवातो व्हड फरकान जिखतले, असो तानावडे हांणी विस्वास उक्तायलो.
लोकसभा वेंचणुकेंत भाजपाचे उमेदवार कोण आसतले, हाचेर उलोवपाक तानावडे हांणी न्हयकार दिलो.
प्रधानमंत्री नरेंद्र मोदी हांच्या नांवांतूच जादू आसा. लोकांचो तांचेर मोग आसा. कार्यकर्त्यां मदीं उमेद आसा. हाका लागून 2024 चे लोकसभा वेंचणुकेंत भाजपा 324 चो आंकडो सहज हुपतलो, अशी आस्त मंत्री गुदिन्हो हांणी उक्तायली.
केंद्राच्यो येवजण्यो खूब आसात. त्यो लोकां मेरेन पावोवन तांचो लाव तांकां मेळोवन दिवपाचे आमचे यत्न आसात. डबल इंजिनाक लागून उदरगतीच्या कामांक चालना मेळटा. हे खातीर गरिबाचें कल्याण करपी केंद्र सरकार परतून सत्तेर येवप गरजेचें आसा, अशें आमदार साळकार हांणी सांगलें. ह्या वेळार जयंत जाधव, उमेश साळगांवकार, शमी साळकार, दीपक नायक हांचीं उलोवपां जालीं. सुत्रसंचालन गौरीश नायक हांणी केलें.
भाजपाक कसलोच भंय नाः तानावडे
भाजपा परतून सत्तेर येवचो ना, अशें खूब जाण म्हणटाले, पूण आमकां 22 सुवातांचो विस्वास आशिल्लो. आमी दोन सुवातो कमी फरकान वगडायल्यो, तरीय लोकांच्या मोगान आमी 20 सुवातो जिखून सरकार स्थापन केलें. भाजपान सेगीत तिसऱ्या वर्सां नवो इतिहास आनी नवो विक्रम रचला. जे मेरेन लोक आमचे वांगडा आसात ते मेरेन आमकां कसलोच भंय ना. मोदी सरकार सगळ्यांत लोकप्रीय आनी आदराचें आसा हाची आपूण हमी दिवपाक शकता, अशें सदानंद तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
