भांगरभूंय | प्रतिनिधी
उत्तर गोंया खातीर खलप, विजय भिके हांणी प्रभारीं कडेन केलो दावो
दक्षीण गोंयांत गिरीश, एल्विस, विरियातो, सार्दिन प्रबळ दावेदार
भांगरभूंय । प्रतिनिधी
पणजी: लोकसभा वेंचणुके खातीर भारतीय जनता पक्षांत इत्सुकांचो आंकडो वाडत आसा. तशेंच काँग्रेसींत लेगीत खूब जाण वेंचणूक लडोपाक इत्सूक आसात. उत्तर गोंयांतल्यान आदले केंद्रीय मंत्री अॅड. रमाकांत खलप आनी विजय भिके हांणी प्रभारी माणिकम टागोर हांचे कडेन उमेदवारीचो दावो केला. दक्षीण गोंयांत एल्वीस गोम्स, गिरीश चोडणकार, विरियातो फर्नांडीस आनी खासदार फ्रांसीस सार्दिन हे प्रबळ दावेदार आसात.
उमेदवारीचेर दावो करपाचो कोणाकूय अधिकार आसा. उमेदवाराची निवड करपाची प्रक्रिया अजून सुरू जावंक ना, अशें प्रदेश अध्यक्ष अमीत पाटकार हांणी सांगलें. पक्षाच्यो बसका तशेंच संघटणात्मक पावंड्यार वावर सुरू आसा. वेंचणूक समिती स्थापन जाले उपरांत उमेदवार थारोवपाची प्रक्रिया सुरू जातली, अशें विधीमंडळ फुडारी युरी आलेमांव हांणी सांगलें.
लोकसभा वेंचणुकेची सेमीफायनल आशिल्ल्या मध्य प्रदेश, राजस्थान, तेलंगण, छत्तीसगड आनी मिझोराम ह्या राज्यांतल्यो विधानसभा वेंचणुको जाल्यात. विधानसभा वेंचणुकांनी भाजपाक व्हड येस मेळ्ळां. पांच राज्यांच्या विधानसभा वेंचणुकां उपरांत लोकसभा वेंचणुकेची चर्चा सुरू जाल्या. काँग्रेसीचे प्रभारी माणिकम टागोर हांणी हालींच गोंयाक भेट दिली. पदाधिकाऱ्यां कडेन जाल्ले बसकेंत लोकसभा वेंचणूक तयारीचेर चर्चा जाली. आदले केंद्रीय मंत्री अॅड. रमाकांत खलप आनी विजय भिके हांणी तांचे कडेन उमेदवारीचो दावो केलो. उत्तर गोंयचे उमेदवारी खातीर सध्या ह्या दोगांनी दावो केला.
दक्षीण गोंयांत लेगीत खूब जाण इत्सूक आसात. आदले प्रदेश अध्यक्ष गिरीश चोडणकार, एल्वीस गोम्स, विरियातो फर्नांडीस आनी खासदार फ्रांसीस सार्दिन हे दावेदार आसात. लोकसभा वेंचणूक लडोवपाक आमी इत्सूक आसात, अशें गिरीश, एल्वीस आनी विरियातो हांणी सांगलां. सध्याचे खासदार आशिल्ल्यान उमेदवारीचेर आपलो दावो आसतलो, अशें फ्रांसीस सार्दिन हांणी हे आदींच स्पश्ट केलां. जिल्हो काँग्रेस समितीन उत्तर गोंय उमेदवारी खातीर आपल्या नांवा सयत अॅड. रमाकांत खलप हांच्या नांवाची शिफारस केल्या, अशी म्हायती विजय भिके हांणी दिली. नव्या कार्यकर्त्यांक पक्षान आतां संद दिवपाक जाय. खूब वर्सां आपूण पक्षाचो वावर करता. हाका लागून आपणें उमेदवारीचेर दावो केला, अशें विजय भिके हांणी सांगलें.
अणभवाक लागून उमेदवारीचेर दावो: अॅड. रमाकांत खलप
खूब वर्सां आपूण राजकारणांत आसा. आमदार, विरोधी पक्ष फुडारी आनी मंत्री म्हूण आपणे वावर केला. केंद्रांत कायदो मंत्री आसतना आपणे जे कायदे केल्ले, ते कार्यवाहींत आसात. अणभव आनी वावराच्या आदाराचेर उत्तर गोंय उमेदवारीचेर आपलो दावो आसतलो, अशें अॅड. रमाकांत खलप हांणी म्हणलां. प्रभारी माणिकम टागोर हांचे कडेन आपणे चर्चा केल्या. कूळ, मुंडकार खटले, कोमुनिदाद जमनी वयलीं बेकायदो घरां, अशें बरेच प्रस्न सध्या आसात. हे प्रस्न संसदेंत मांडून ते सुटावे करपाक आपूण प्राधान्य दितलों, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
