लोककल्याणाच्या येवजण्यांची येसस्वी अंमलबजावणी : मोदी

भांगरभूंय | प्रतिनिधी

प्रधानमंत्र्यांनी येवजण्यांच्या लावधारकां कडेन सादलो संवाद

पणजीः सरकारी येवजण्यांचो लाव गरजू लोकांक जावचो म्हूण वेवस्थेत योग्य बदल केला. आयज सरकार नव भारत निर्माण करपा खातीर वावर करता. आत्मनिर्भर भारताचें उद्दीश्ट साध्य करपा खातीर लोककल्याणकारी येवजण्यांची येसस्वीपणान अंमलबजावणी जाता. ‘सबका साथ, सबका विस्वास’ हो मंत्र घेवन सरकार उदरगतीचीं पावलां मारतां, अशें प्रधानमंत्री नरेंद्र मोदी हांणी सांगलें.

प्रधानमंत्री नरेंद्र मोदी हांणी गोंय राज्यांतल्या केंद्र पुरस्कृत कल्याणकारी येवजणो आनी उपक्रमांच्या लावधारकां कडेन संवाद सादलो. आझादी का अमृत महोत्सवाचो भाग म्हूण शिमला, हिमाचल प्रदेश हांगा आयोजीत गरीब कल्याण संमेलनाच्या माचये वयल्यान व्हिडिओ कॉन्फरन्सिंगच्या माध्यमांतल्यान प्रधानमंत्री नरेंद्र मोदी हांणी केंद्र पुरस्कृत येवजणांच्या लावधारकां कडेन संवाद सादलो. हिमाचल प्रदेश राज्याचे राज्यपाल राजेंद्र आर्लेकार ह्या वेळार उपस्थीत आशिल्ले.
उत्तर गोंयांत पणजे मिनेझीस ब्रागांझा संस्थेच्या सभाघरांत जाल्यार दक्षीण गोंयांत मडगांवां रवींद्र भवनांत गरीब कल्याण संमेलनाच्या व्हिडिओ कॉन्फरन्सिंगाची वेवस्था केल्ली.
ह्या वेळार मोदी हांणी किसान सम्मान निधी येवजणेच्या अकराव्या हप्त्याची 21 हजार कोटींचीं रक्कम लावधारकांच्या बँक खात्यांत जमा केली.
प्रधानमंत्री किसान सम्मान निधी, प्रधानमंत्री उज्ज्वला येवजण, पोशण अभियान, प्रधानमंत्री वेदना येवजण, स्वच्छ भारत अभियान, जल जीवन अभियान, अमृत येवजण, स्वनिधी येवजण, एक राष्ट्र-एक रेशनकार्ड, प्रधानमंत्री गरीब कल्याण अन्न येवजण, आयुषमान भारत, मुद्रा येवजण आनी हेर येवजणांच्या बाबतींत प्रधानमंतत्री माेदी हांणी लावधारकां कडेन संवाद सादलो.
मिनेझीस ब्रागांझा कार्यावळींत मुख्यमंत्री डॉ. प्रमोद सावंत हांणी गोंयांतल्या केंद्र पुरस्कृत येवजणांच्या लावधारकां कडेन संवाद सादलो आनी गोंयच्या हेर पात्र लोकांनी केंद्र पुरस्कृत येवजणांचो लाव घेवपा खातीर फुडें येवपाचो उलो मारलो.
पर्यटन मंत्री रोहन खंवटे, नुस्तेमारी मंत्री निळकंठ हळर्णकार, ईडीसीचे अध्यक्ष सदानंद शेट तानावडे, मयेंचे आमदार प्रेमेंद्र शेट, बंदर खात्याचे सचीव पी. एस. रेड्डी, ग्रामीण विकास सचीव संजय गिहार, नगर विकास सचीव रमेश वर्मा आनी हेरांची ह्या वेळार उपस्थिती आशिल्ली.
मडगांवां संवाद कार्यक्रमाक येरादारी मंत्री माॅवीन गुदिन्हो, उदकास्त्रोत मंत्री सुभाष शिरोडकार, खेळां मंत्री गोविंद गावडे, वीज मंत्री सुदीन ढवळीकर, समाज कल्याण मंत्री सुभाष फळदेसाय, एनआरआय आयुक्त नरेंद्र सावयकार आनी हेर मानेस्त उपस्थीत आशिल्ले.

येवजण्यो लोकां मेरेन पावपाक वेवस्थेंत बदलः मुख्यमंत्री
पयलीं लोककल्याणकारी सरकारी येवजणो सोंपेपणी लोकां मेरन पावनासल्यो, पूण आयज लोककल्याणकारी सरकारी येवजणो लोकां मेरेन सोंपेपणी पावतात आनी लोक तांचो लाव घेतात. आयज ‘स्टार्ट अप’ सारक्या येवजणांचो लाव घेवप सोंपे जालां. आतां येवजणांचे पयशे थेट लावधारकांच्या बँक खात्यात जमा जातात. अशें जाल्ल्यान मध्यस्थां कडल्यान गरीब लावधारकांची फटवणूक जावपाचे बंद जाला. केंद्र पुरस्कृत येवजण्यांची येसस्वी अंमलबजावणी जाता, अशें गोंयचे मुख्यमंत्री डॉ. प्रमोद सावंत हांणी म्हणलें.