भांगरभूंय | प्रतिनिधी
पक्षाच्या चेपणाक लागून घेतलो निर्णय, बेगिनूच तृणमुलाक दितले सोडचीट
भांगरभूंय I प्रतिनिधी
पणजी : आदले मुख्यमंत्री लुईझीन फालेरो हांणी राज्यसभा वांगडीपदाचो राजिनामो दिवन मंगळारा सगल्यांक धपको दिलो. वैयक्तीक कारणा खातीर राजिनामो दिल्ल्याचे तांणी सांगलां. सध्या तरी खंयच्याच पक्षांत प्रवेश करपाचो विचार ना. गोंयचे प्रस्न सुटावे जावपा खातीर म्हजो वावर सुरूच उरतलो, अशे तांणी सांगलें.
विधानसभा वेंचणुके पयलीं नोव्हेंबर 2021त फालेरो हांणी तृणमूल काँग्रेसींत प्रवेश केल्लो. पक्षाच्या राष्ट्रीय उपाध्यक्ष पदा सयत तांकां राज्यसभेची खासदारकी पक्षान दिल्ली. खासदारकीक एक वर्स पुराय जाले उपरांत तांणी राजिनामो दिला. विधानसभा वेंचणुकेंत तृणमुल काँग्रेसीन तांकां फातोड्डें मतदारसंघांत उमेदवारी दिल्ली. उमेदवारी जाहीर जावन लेगीत तांणी विधानसभा वेंचणूक लडोवपाक न्हयकार दिलो. हाका लागून पक्षा कडेन तांचे संबंद इबाडले. खासदारकी सोडपाचे चेपण तांचेर आशिल्ले. ह्या चेपणाक लागून तांणी राजिनामो दिला, अशी चर्चा आसा. वैयक्तीक कारणाक लागून आपणे खासदारकीचो राजिनामो दिला, अशें फालेरो हांणी सांगलें.
लुईझीन फालेरो हे फाटली चार दशका गोंयच्या राजकारणांत आसात. 1980 त सगल्यांत पयलीं ते नावेली मतदारसंघांतल्यान आमदार म्हूण वेंचून आयलें. डॉ. विल्फ्रेड डिसोझा हांच्या गोवा काँग्रेस पक्षांतल्यान तांणी राजकारणांत प्रवेश केलो. उपरांत तांणी काँग्रेसींत प्रवेश केलो. 1980, 1984, 1989, 1994, 1999, 2002 आनी 2017ची विधानसभा वेंचणूक नावेली मतदारसंघांतल्यान तांणी जिखल्या. 2007तले विधानसभा वेंचणुकेंत चर्चील आलेमांव हांणी तांचो हारयले. 2012ची वेंचणूक तांणी लडोवंक ना. 1999 वर्सा ते राज्याचे मुख्यमंत्री आशिल्ले. प्रदेश काँग्रेस अध्यक्षपदा सयत विरोधी पक्ष फुडारी म्हूण तांणी वावर केला. तृणमूल काँग्रेसींत प्रवेश केले उपरांत ते राज्यसभेचे खासदार जाले. सर्गेस्त मनोहर पर्रीकार हे उत्तर प्रदेशांतल्यान राज्यसभेंत पाविल्ले. फालेरो अस्तंत बंगाल राज्यांतल्यान राज्यसभेर पावले.
राजकी सल्लागार प्रशांत किशोर, खासदार डेरीक ओब्रिएन हांणी फालेरो हांचे कडेन सगल्यांत पयलीं संपर्क सादलो. अस्तंत बंगालांत पक्षाच्यो राष्ट्रीय अध्यक्ष ममता बॅनर्जी हांची भेट घेवन तांणी तृणमूल काँग्रेसींत प्रवेश केल्लो.
बरेच पक्ष संपर्कांत, सध्या खंयच्याच पक्षांत प्रवेश ना
लुईझीन फालेरो हांणी खासदारकीचो राजिनामो दिला, पूण अजून तांणी तृणमूल काँग्रेसीक सोडचीट दिवंक ना. ते तृणमूल काँग्रेस सोडपाचे निश्चीत आसा. बऱ्याच पक्षांनी आपणा कडेन संपर्क सादला. सध्या तरी खंयच्याच पक्षांत प्रवेश करपाचो म्हजो विचार ना. गोंया खातीर म्हजो वावर सुरूच उरतलो. राज्यसभेंत जे प्रस्न हांवेन उपस्थीत केल्ले, ते सुटावे जावचें, म्हूण हांव वावर करतलो, अशें फालेरो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
