भांगरभूंय | प्रतिनिधी
नवी दिल्ली, खबरां संस्था ः बालविवाह हो एक चिंतेचो विशय. अशा लग्नांक लागून समाजांत वेगवेगळे प्रस्न निर्माण जातात. देखूनच पीसीएमए म्हळ्यार ‘द प्रोहिबिशन ऑफ चाइल्ड मॅरेज कायदो 2006’ प्रमाण भारतांत चलो 21 वर्सां पुराय आनी चली 18 वर्सां पुराय केल्यारूच लग्न जावंक शकता. नाजाल्यार तें लग्न बेकायदेशीर मानतात. हे फाटभुंयेर हिमाचल प्रदेशच्या राज्य मंत्रीमंडळ बसकेंत व्हड निर्णय घेतला. हिमाचल प्रदेश सरकारान चलयांक लग्न जावपाची उण्यांत उणी पिराय 21 वर्सां मेरेन वाडोवपाचो निर्णय घेतला. म्हळ्यार पिरायेच्या 21 वर्सां आदीं चलयेचें लग्न जाल्यार चलयेच्या आवय-बापायक ख्यास्त जावंक शकता.
हिमाचल प्रदेशाचे मुख्यमंत्री सुखविंदर सिंग सुखू हांच्या अध्यक्षतेखाला जाल्ले मंत्रीमंडळ बसकेंत हो निर्णय घेतला. हे संबंदी संबंदीत नेम आनी कायद्यांत दुरुस्ती करपाक बसकेंत मान्यताय मेळ्ळ्या. मंत्रीमंडळ बसकेंत चलयांचे लग्न जावपाची पिरायी कितली आसची हे विशीं चर्चा जाली. आतां हे संबंदी प्रस्ताव केंद्र सरकाराक मान्यताये खातीर धाडटले.
लग्नाची पिराय वाडोवन चलयांक कुपोशणा पसून राखण दिवपाची सरकाराची इत्सा आसा, कारण बालविवाह केल्ल्यान मागीर आवय जावप हांचे भलायकेचेर चड वायट परिणाम जाता. जायत्या चलयांचें लग्न बेगीन जालें जाल्यार तांका तांच्या करिअरांत फुडें वचूंक मेळना.
भारतांत चल्यांक लग्नाची पिराय 21 वर्सां आनी चलयांची पिराय 18 वर्सां आसा. हाचे पयलीं हिंदू लग्न कायदो 1955 प्रमाण लग्नाची पिराय चले 18 वर्सां आनी चलयांची 15 वर्सां आशिल्ली. 1978 वर्सा चलयांची लग्नाची पिराय 18 वर्सां आनी चल्यांची पिराय 21 वर्सां जाली. आतां चलयांची पिराय 21 वर्सां करपाची तयारी सुरू आसा. तेच बरोबर केंद्र सरकारान चलयांची लग्नाची उण्यांत उणी पिराय 18 वर्सां वयल्यान 21 वर्सां मेरेन वाडोवपाचोय निर्णय घेतला. डिसेंबर 2021 वर्सा हे संबंदीं विधेयक लोकसभेंत मांडिल्ले. सध्या संसदीय समिती मुखार ताचेर विचार सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
