भांगरभूंय | प्रतिनिधी
इंडीयन प्रिमीयर लिगेचे (आयपीएल) 42वे मॅचींत लखनौ सुपर जायण्ट्सान पंजाब किंग्साक 20 धांवड्यांनी हारयलो. पंजाबाक जैता खातीर 154 धांवड्यांची मोख मेळिल्ली. पूण, ताका निर्धारीत 20 ओव्हरींनी 8 विकेटी वगडावन 133 धांवड्यो करप शक्य जाल्यो.
पंजाबाची बॅटींग सामकी फ्लॉप थारली. ताचे वतीन बॅयरस्टोन 32 धांवड्यो केल्यो.
लखनौचें हें सवें जैत थारलें. लोकेश राहुलाच्या फुडारपणाखाला खेळपी लखनौन आतां मेरेन फक्त तीन मॅची वगडायल्यात.
ते आदीं पंजाब किंग्सान टॉस जिखून लखनौ सुपर जायण्ट्साक पयलीं बॅटींग करपाचें आमंत्रण दिलें. पंजाबाच्या मुखेल्याचो निर्णय फास्ट बॉलर कॅगिसो रबाडा आनी ताच्या वांगड्यांनी योग्य थारायतना लखनौ सुपर जायण्ट्साचो डाव 8 बाद 153चेर आडायलो.
ताची मदली फळी सामकी गडगडली. 13 धांवड्यां भितर ताणें पांच विकेटी वगडायल्यो. मजगतीं, रबाडान फॉर्मांत आशिल्लो मुखेली लोकेश राहुलाक (6) बाद करून पंजाबाक पयलें येस मेळोवन दिलें. पूण, दुसरो ओपनर क्विंटन डी कॉकान प्रतिस्पर्धीचेर शेक दवरपाची रणनिती आपणायली. ताणें आक्रमक बॅटींग केल्ल्यान लखनौक पावर प्लेंत 39 धांवड्यो करप शक्य जाल्यो.
दीपक हुड्डाक वयले सुवातेर बॅटिंगेक धावपाचो पंगड वेवस्थापनाचो निर्णय योग्य थारायलो. दोगांयनी दुसरे विकेटी खातीर 75 धांवड्यांची भागिदारी करून लखनौक बरे स्थितींत हाडलो. अखेरेक ही जोडी संदीप शर्मान फोडली. ताणें डी कॉकाक वैयक्तीक 46 धांवड्यांचेर बाद केलो.
डी कॉक बाद जाल्या उपरांत लखनौची बॅटींग फळी अचकीत गडगडली. जॉनी बॅयस्टोवान हुड्डाक धांवबाद केलो. जाल्यार कृणाल पांड्या पांच आनी आयुष बडोनी चार धांवड्यो करून तंबूंत परतले. मार्कस स्टोयनीसाक (1) लेगीत व्हड खेळी करपाक जमली ना. एका वेळार लखनौचो स्कोर 1 बाद 98 आशिल्लो तो 6 बाद 111 जालो.
सकयले सुवातेर बॅटींग करपी जेसन होल्डर (11), दुश्मंता चमीरा (17) आनी मोहसीन खान (नाबाद 13) हांणी म्हत्वाची खेळी करून पंगडाचो स्कोर 150 वयर पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
