भांगरभूंय | प्रतिनिधी
टॅनीस खेळांतल्या म्हान खेळगड्यांतलो एक रोजर फॅडररान अखेरेक टॅनिसांतल्यान निवृत्ती घेतली. आदीं केल्ले घोशणे प्रमाण 41 वर्सां पिरायेच्या फॅडररान लेव्हर करंड सर्तींत आपलो निमाणी मॅच खेळ्ळो. दादल्यांच्या दोट्टी गटांत स्पेनाच्या राफायल नादाला वांगडा खेळटना फॅडरराक फ्रान्सीस टियाफो आनी जॅक सॉक हे अमेरिकचे जोडये कडल्यान 6-4, 6-7 आनी 9-11 अशा सेटांनी हार घेवची पडली.
अखेरची मॅच खेळ्ळ्या उपरांत फॅडरर भावूक जालो. आपूण दुख्खी ना…खोशी आसा अशें ताणें दोळ्यांतल्यान दुकां काडीत म्हणलें.
ताणें कोर्टाचेर उबो रावन प्रेक्षकांक अभिवादन केलें. उपरांत सर्बियाचो स्टार खेळगडो नोवाक जोकोवीच हाची भेट घेतली. हे मजगतीं, नादाल लेगीत भावूक जालो.
फॅडरर सध्याच्या युगांतलो टॅनीस सम्राट म्हणून सगल्यांचे वळखीचो आशिल्लो. तो आपले शैलीदार टॅनीस शॉर्टा खातीर प्रसिद्ध आशिल्लो. तो सहज रितीन बॅकहॅण्ड शॉर्ट खेळटालो.
फॅडरर आतां मेरेन 20 ग्रॅण्ड स्लॅम किताब जिखला. हातूंत स ऑस्ट्रेलियन ओपनाचो, एक फ्रॅंच ओपनाचो, आठ विम्बल्डनाचो आनी पांच अमेरिकन ओपनाचो आस्पाव आसा. ताणें 2018त आपलो निमाणो ग्रॅण्ड स्लॅम किताब ऑस्ट्रेलियन ओपनाच्या रुपान जिखिल्लो.
दादल्यांच्या एकोड्या गटांत 20 ग्रॅण्ड स्लॅम किताब जिखपी फॅडरर पयलो टॅनीस खेळगडो. तो सुमार 310 सप्तक एटीपीच्या रॅंकिंगेंत पयले सुवातेर आशिल्लो, जाल्यार सेगीत 237 सप्तक पयले सुवातेर आशिल्लो. सगल्यांत चड सप्तक पयले सुवातेर उरपाचो संवसारीक विक्रम ताच्याच नांवाचेर आसा. तशेंच सेगीत पांच वर्सां अमेरिकन ओपन (2004 ते 2008) ग्रॅण्ड स्लॅम किताब जिखपी तो एकमेव टॅनीस खेळगडो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
