भांगरभूंय | प्रतिनिधी
भांगरभूंय । प्रतिनिधी
पर्वरीः रेईश मागुश पंचायत वाठारांत व्हाळांत हांगा लान्स लोबो हांणी बेकायदेशीरपणान केल्लें तीन ल्हान इमारतींचें बांदकाम मुंबय उच्च न्यायालयाच्या गोंय खंडपीठ तशेंच बार्देशचो मामलेदार आनी बीडीओन दिल्ल्या आदेशा प्रमाण निमाणे मोडून उडयलें. पंचायत सचीव, बीडीओ अधिकारी आनी पुलिसांचे हाजेरेंत जेसीबी मशिना वरवीं बांदकाम मोडपाचें काम जालें.
जमीन डेव्हलोपर लोबो हांणी रेईश मागुश हांगच्या सर्वे 75-1 बांदकामा खातीर सादर केल्ल्या आराखड्यांक 1996 वर्सा नियोजन खात्यान मान्यताय दिल्ली. प्रत्यक्षात तांणी मूळ आराखड्यांत बदल करून बांदकाम केल्लें. ताका लागून तांकां ऑक्युपन्सी प्रमाणपत्र मेळपाक शकलें ना. 2001 वर्सा तांणी सुदारीत आराखडो सादर करून चार बांदकामा सुरक्षीत करपाची वेवस्था केली. नियोजन खात्यान ताका मान्यताय दिली. बेकायदेशीरपणान केल्ली तीन बांदकाम तांणी मोडून उडपाचें काम केलें ना.
रेईश मागुश पंचायत मंडळान 2012 वर्सा तांकां बांदकामां मोडून उडोवपा खातीर नोटीस जारी केल्ली. ह्या आदेशाक लोबो हांणी नियोजन खातें, अतिरिक्त पंचायत संचालक आनी जिल्हो न्यायालयांत आव्हान दिल्लें. ताकां थंय थाकाय मेळपाक शकली ना म्हणून तांणी गोंय खंडपिठांत याचिका सादर केल्ली. पंचायतीचो आदेशाची अंमलबजावणी करपाक मेळची न्हंय हे खातीर लोबो हांचे यत्न चल्ल्यात हें मतींत घेवन खंडपिठान बेकायदो बांदका मोडून उडोवपाचो आदेश 2012 वर्सा दिल्लो. लोबो हे आव्हान दित राविल्ल्यान फाटल्या 10 वर्सां सावन बांदकाम मोडून उडोवपाचें उरिल्लें. निमाणे ताची कार्यवाही जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
