भांगरभूंय | प्रतिनिधी
2025 मेरेन एक अब्ज लोकांक मोहिमेंत वांटेकार करपाचें उद्दिश्ट
भांगरभूंय I प्रतिनिधी
पणजी : वाचनाचे मोहिमेंत 2025 मेरेन एक अब्ज लोकांक वांटेकार करपाचें उद्दिश्ट आशिल्या प्रुडंट मिडिया आनी ‘रीड इंडिया 2022’ महोत्सवाचो आयज शुभारंभ जाता. मुख्यमंत्री डॉ. प्रमोद सावंत हांचें हस्तुकीं सकाळीं 10.30 वरांचेर दोना पावलाच्या सिदाद द गोवा हॉटेलांत कार्यावळीचें उक्तावण जातलें.
शिक्षण संचालक शैलेश झिंगडे, ज्ञानपीठ पुरस्कार जैतिवंत साहित्यीक दामोदर मावजो, रीड इंडिया कार्यावळीचे संस्थापक रघुराम अनंतोज हांची कार्यावळीक हजेरी आसतली. प्रुडंट स्कॉलर येवजणेक योगदान दिल्या शिक्षकांचो ह्या वेळार भोवमान जातलो.
रीड इंडिया महोत्सवांत 2022त शंबर दिसांत 100 कोटी वाचकांची नोंद करपाचें उद्दिश्ट आसा. फाटल्या वर्सा हे मोहिमेक व्हड प्रतिसाद मेळिल्लो. 2021 वर्सा देशांतल्या 29 राज्यांतल्यान 10 हजार विद्यालयांतल्या 3 लाख 30 हजार विद्यार्थ्यांनी नोंदणी केल्ली. हातूंत अमेरिका, युएई ओमान ह्या देशांतले विद्यार्थी आशिल्ले. हाचे पयलीं 2020त जाल्ल्या महोत्सवांत 25 राज्यांतल्या 100 परस चड विद्यालयांतल्या विद्यार्थ्यांनी नोंदणी केल्ली. हातूंत अमेरिका, कॅनडा, युएई आनी न्युझिलँडांतल्या विद्यार्थ्यांचो आस्पाव आशिल्लो.
कार्यावळींत वांटो घेवपा खातीर www.readindia.info हाचेर नोंदणी करप गरजेचें. पुस्तक, काणी वा लेख वाचून ‘ए 4’ आकाराच्या दोन पानांचेर आपले निश्कर्श तशेंच व्हिडियो सादर करपाची गरज आसा. पुस्तक, काणी वा लेख वाचून कितें ज्ञान मेळ्ळें ते एका कागदाचेर बरोवन सादर करपाक जाय. दुसऱ्या कागदाचेर समस्येचेर उपाय येवजण वा उपाय बरोवन सादर करप गरजेचें. सविस्तर म्हायती readindia.info संकेतथळाचेर उपलब्ध आसा.
नोंदणी खातीर 15 ऑगस्ट ही निमाणी तारीख आसा. सादर करपा खातीर 30 ऑगस्ट ही निमाणी तारीख आसा. हिंदी, मराठी, तेलगू, बंगाली वा इंग्लीश भाशेंतल्यान बरोवन सादर करपाची मेकळीक आसा. पयल्या फेरयेची तपासणी सप्टेंबर/ऑक्टोबरांत जातली. दुसऱ्या फेरयेची तपासणी नोव्हेंबरांत जातली. डिसेंबरात निमाणी फेरी जातली.
अदीक म्हायती खातीर [email protected] वा 91 8688120864 वा 9441456061 ह्या क्रमांकाचेर संपर्क सादचो, अशी कळोवणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
