भांगरभूंय | प्रतिनिधी
असले प्रकार खपोवन घेवचे नात, नगराध्यक्षाची शिटकावणी
वास्को: कर्मा पॉयंट इमारतीच्या सोंपणां पोंदा एका अनवळखी मनशान रातयांत उबारिल्लो गाडो मुरगांव पालिकेन काल (सोमारा) मातयेभरवण केलो. असले प्रकार खपोवन घेवचे नात अशी शिटकावणी मुरगांव पालिकेचे नगराध्यक्ष लिओ रॉड्रिगीश हांणी दिली.
ह्या वाठारांत रातयांत गाडे उबारपाची परंपरा आसा. ताचे आड आवाज उठयतात, पूण कसलीच कारवाय जायना. पूण कर्मा पॉयंट इमारतीच्या सोंपणां पोंदा उबारिल्ल्या गाड्यार कारवाय केल्ल्यान नागरिकांनी समाधान उक्तायलें.
ह्या इमारतीच्या सोंपणां पोंदा शेनवारा रातीं धा उपरांत कोणे तरी एका अनवळखी मनशान गाडो उबारलो. हो गाडो उबारतना ताचे भोंवतणी लोखंडाचे पत्रे लायले. तशेंच लोखंडाचे शटरूय बसयलें. वेल्डींग करून हो गाडो ते सुवातेर घट्ट केलो. आयतारा सकाळीं त्या इमारतीच्या तळमाळ्या वयले दुकानदार आयले तेन्ना तांचे नदरेक हो गाडो पडलो. ह्या गाड्याक लागून थंयच्या दोन दुकानां कडेन वचपी वाट आडावली. तशेंच दुकानां गिरायकांचे नदरेक पडना जालीं.
ह्या प्रकरणांत त्या दुकानदारांनी नगराध्यक्ष लिओ रॉड्रिगीश आनी वास्कोचे आमदार कृष्णा साळकार हांकां म्हायती दिली. ताका लागून सोमारा हो गाडो जेसीबी वरवीं मातयेभरवण केलो. ह्या गाड्याचेर हक्क सांगपाक कोणूच मुखार आयलो ना. ताका लागून तो कोणे उबारला हें अजून स्पश्ट जाल्लें ना. पूण संबंदितांक कोणाचो आशिर्वाद आशिल्ले बगर तो रातच्या वेळार गाडो उबारपाचो धोको पत्करचो ना अशी प्रतिक्रिया व्यक्त जायत आसा.
गाडो मातयेभरवण करतना नगराध्यक्ष रॉड्रिगीश थंय जातीन हाजीर आशिल्ले. पालिका कचेरे पसून कांय अंतराचेर ही इमारत आसा. आपूण बेकायदो गजाली सोंसून घेवचो ना. आपणाक आमदार कृष्णा साळकार हांचो पूर्णपणान तेंको आशिल्ल्याचें रॉड्रिगीश हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
