भांगरभूंय | प्रतिनिधी
पणजी : आमदार व्हेंझी व्हिएगस हांणी मंगळारा विधानसभा सभाघरांत धोको निर्माण करपी इमारतीं विशीं विचारिल्ल्या प्रस्नाचेर मुख्यमंत्री डॉ. प्रमोद सावंत हांणी, राज्यांतल्यो धोको निर्माण करपी ११० इमारती मोडटले, अशें सांगलें. १०५ इमारतींची दुरुस्ती करपाचो निर्णय सरकारान घेतला. तशेंच हेर २४६ इमारतींचीय दुरुस्ती करतले अशें तांणी सांगलें.
आमदार व्हिएगस हांणी प्रस्न जापेच्या काळांत, राज्यांतल्यो खुबश्यो इमारती धोको निर्माण करतात. फुडाराक तांचो थळाव्यांक फटको बसपाची शक्यताय आसा. राज्य सरकार परत परत ह्या इमारतींची दुरुस्ती करपाची वा मोडून उडोवपाची हमी दिता. मात प्रत्यक्षांत सरकार कांयच करिना असो आरोप केलो.
आमदार व्हिएगस हांकां जाप दितना मुख्यमंत्र्यांनी सांगलें, राज्यांत ३० वर्सां भितरल्यो १,३८३, ३० ते ५० वर्सां मजगतच्यो १,०४६ आनी ५० वर्सां वयल्यो १२९ इमारती आसात. तशेंच १५ दायज इमारती, ५५२ निवासी आनी २३१ कार्यालयीन इमारती आसात. हातुंतल्या १९२ इमारतींचें आतां मेरेन ऑडीट केलां. तांतल्यो धोको निर्माण करपी ११० इमारती मातये भरवण करपाचो निर्णय सरकारान घेतला. तशेंच ३१ मार्च २०२५ मेरेन राज्यांतल्या सगळ्या दायज इमारतींची दुरुस्ती करपाचो निर्णय सरकारान घेतला.
सुरक्षिततायेच्या कारणाक लागून लोकांक हे इमारतींत प्रवेश करपाक बंदी घाली. कांय इमारतींनी लोक रावतात. तांणी इमारती रित्यो केले उपरांत आनीक कांय इमारती धोको निर्माण करपी म्हणून घोशीत करतले, अशें तांणी मुखार म्हणलें.
समाज कल्याण खात्याचें स्थलांतर
समाज कल्याण खात्याक पर्वरे जागो दिला. मात, थंयचें फर्निचराचें काम आजूनय पुराय जावंक नाशिल्ल्यान खात्याचें काम पणजेचे इमारतींतल्यान चालू आसा. पर्वरेच्या नव्या कार्यालयाचें काम पुराय जाले उपरांत समाज कल्याण खात्याचो कारभार थंयच्यान चलयतले. उपरांत पणजेचे इमारतीची दुरुस्ती करून ती समाज कल्याण खात्याचे सुवादीन करतले.
इमारतींच्या कामां खातीर ६०० कोटी
राज्यांतल्या सरकारी इमारतींच्या दुरुस्ती आनी त्यो परत बांदपा खातीर सरकारान ६०० कोटींच्या निधीची तरतूद केल्या. हे निधींतल्यान फुडल्या काळांत मोडपाक पाविल्ल्या सगळ्या इमारतींची दुरुस्ती करतले. वांगडा गरज आसा त्यो इमारती परत बांदतले, अशेंय मुख्यमंत्र्यानी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
