भांगरभूंय | प्रतिनिधी
खबरां संस्था
चेन्नयः तामिळनाडून जावपी 44वे बुद्दिबळ ऑलिम्पियाड खातीर संवसारातले बुद्दिबळ खेळगडे 28 जुलय एकठांय येतले. ही सर्त इतिहासीक म्हत्वाच्या मामल्लापुरम हांगा जातली. चीन हे सर्तींत वांटेकार जावचो ना. तशेंच युक्रेनाचेर हल्लो केल्ले खातीर रशियन पंगडाक हे वांटेकार जावपाची परवानगी ना. अशे स्थितींत भारताक भांगरा पदक जिखपाची संद आसा.
28 जुलय तें 10 ऑगस्ट मजगतीं जावपी हे सर्तींत 187 देशांतले 343 पंगड आनी सुमार 2500 खेळगडे वांटेकार जातले. भारतीय पंगडांत 25 खेळगडे आसात. तातूंत तामिळनाडूच्या आप प्रज्ञानंदाचो आसपाव आसा. भारताच्या अ पंगडांत विदित गुजराथी, हरिकृष्ण, अर्जुन अरिगासी, नारायणन, शशिकरण हांचो, जाल्यार ब पंगडांत निहाल सरीन, गुकेश, अधिबान, प्रज्ञानंद, रौनकाचो आसपाव आसा. बायलांच्या अ पंगडात कोनेरू हंपी, हरिका, वैशाली, तानिया सचदेव, भक्ती कुलकर्णी आनी ब पंगडांत वंतिका, सौम्या, गोम्स मेरी अॅन, पद्मिनी राऊत, दिव्या देशमुख ह्या खेळगडींचो आसपाव आसा. संवसारीक जैतिवंत विश्वनाथन आनंद भारताचो मार्गदर्शक आसा.
सर्तीचो खर्च 92 कोटी
तामिळनाडू सरकारान हे सर्तीच्या आयोजना खातीर 92.13 कोटी रुपयांची तजवीज केल्या. 36 हॉटेलां बुक केल्यांत. सर्त सुरू जावपा खातीर कांय सप्तकां बाकी आसात. सगळे कडेन सर्तीची नेटान तयारी चल्ल्या. 20 एकर जमनीत आशिल्ल्या शेरेटन ग्रूप हॉटेलांत ही सर्त जातली. 10 एकर सुवातेंत पार्किंगाची वेवस्था केल्या. ममल्लापुरम हे पर्यंटन थळ आसा. ताका लागून तामिळनाडूच्या पर्यटन विभागा वतीन नेटान काम सुरू आसा. कोविडाची भिरांत आशिल्ल्यान खेळगड्यांक मास्क घालपाक लावपाक सांगपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
