भांगरभूंय | प्रतिनिधी
मडगांव: रवींद्र भवन इमारतीच्या दुरुस्तीच्या कामा खातीर आनीक चार म्हयने बंद उरतलें अशी म्हायती अध्यक्ष राजेंद्र तालक हांणी दिली. भौशीक बांदकाम खात्यान सिलिंग आनी वणटींच्यो कांय दुरुस्ती सुचयल्यात. ते खातीर बांदकाम खात्या कडल्यान कामां हातांत घेतले अशें तांणी सांगलें.
मडगांव रवींद्र भवनांत पत्रकार परिशदेंत ते उलयताले. ह्या वेळार तांचे सयत वांगडी सचीव स्वाती दळवी, उपाध्यक्ष मनोहर बोरकार, तियात्र अकादमीचे अध्यक्ष अँथनी बार्बोझा हाजीर आशिल्ले.
तालक हांणी सांगलें, रवींद्र भवनाच्या पाख्याचें काम मे म्हयन्यांत सुरू केल्लें. मॉन्सुनपूर्व पावसाक लागून तें काम लांबणेर पडलें. पाख्याचें दुरुस्तीचें काम पुराय जालां. रवींद्र भवन ही वास्तू बांदकाम खात्या कडेन आसा. खात्याच्या अधिकाऱ्यां कडल्यान मुखेल सभाघरा सयत भवनाच्या वास्तूची पळोवणी करतले. ताचे पयलीं सभाघर सुरू करचें न्हय अश्यो सुचोवण्यो आसात. तांणी दिल्ल्या अहवालांत सिलिंगाची दुरुस्ती करपाची गरज आसा आनी तें बदलपाच्यो सुचोवण्यो केल्यात.
सिलिंग कांय कडेन पडलां. सिलिंगे सयत कदेलां, कार्पेट आनी हेर कामांय करतले. तियात्रिस्तां बराबरूय हे विशीं बसका घेवन तांकां म्हायती दितले. तांचो तेंको हाचे पयलींच रवींद्र भवनाक मेळ्ळा. तियात्रिस्तांच्या तिकेट कावंटराचो प्रस्नूय सोडयतले. सभाघर सुरू करचे पयलीं 15 दीस तियात्रिस्तांक म्हायती दितले अशें तालक हांणी सांगलें.
मुखार उलयतना तालक हांणी म्हणलें, रवींद्र भवना सयत एनएक्स इमारतीचें कामूय सुरू आसा. ते खातीर अडेज कोटींचो खर्च करतले. जाता तितले बेगीन बरें काम करपाचो यत्न आसा. सरकारा कडेन निधी उपलब्ध करपाची विनंती करतले. ते खातीर तीन ते चार म्हयने रवींद्र भावनांतलें सभाघर बंद दवरतले. रवींद्र भवनाच्या कामाक 18 वर्सां जालीं. कांय कामां करपाची गरज आसा अशें तांणी म्हणलें.
अँथनी बार्बोझा हांणी बांदकाम विभागाच्या अहवाला प्रमाण सभाघराच्या दुरुस्तीचें काम गरजेचें आसून कसलीच अनुचीत घडणूक घडची न्हय हे खातीर हें काम पुराय जावपा खातीर तियात्रिस्तांनी सहकार्य करपाचें आवाहन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
