भांगरभूंय | प्रतिनिधी
सद्या पणजे इफ्फीचो बोवाळ चल्ला. हाची सुरवात जरी मुंबयंत जाली तरी गोंयांक कायम हो महोत्सव जावपाक लागलो. हाचें स्रय नक्कीच मनोहर पर्रीकार हांकां दिवपाकूच जाय. मनोहरभाईन सुषमा स्वराज्य हांचे कडेन उतर घालून हो महोत्सव गोंयांत जावचो असो आग्रो धरलो आनी गोंय एक- दोनदांच न्हय, तर ह्या महोत्सवाचे कायम केंद्र जालें. ह्या निमतान देश विदेशांतले सिनेमातले अणभवी, नवे अभिनेते, दिगदर्शक, निर्माते हांची गर्दी पणजे जावपाक लागली. जेन्ना असलो व्हड महोत्सव जाता, तेन्ना वातावरण निर्मिती जरूर जाता. जरी गोंयान चित्रपट केंद्र ना, तें लागींच्या मुंबय शारांत आसा, तरी सोबीत सैमाक लागून गोंयांत जायत्या चित्रपटांचें चित्रीकरण जालां. कांय जाण आमी फक्त बाऊन्सर आनी चित्रीकरणा खातीर सुवाती दिवपाच्यो, अशे टोमणे मारताले. पूण आतां हांगा चित्रपट निर्मिती लेगीत जाल्या. वायट शर्ट, विंड चायम्स, गोंय स्वातंत्र्याचें होमखंड, वागरो हीं कांय उदाहरणां आसात. हाचो अर्थ वातावरणाचो लाव जाता आनी ह्या मातयेंतल्यान दिग्दर्शक- अभिनेते- लेखक तयार जावंक शकतात.
हें वातावरण तशेच अणभवी अनुपम खेर, त्रिपाठी हांचें मनोगत आयकून, व्हड चित्रपट कलाकारांक पळोवन आपुणूय ह्या रंगीत पडद्याचेर करियर करपाक वच्चें, अशे खंयच्याय उमेदवाराक दिसू येता. जरी गोंयान ल्हान प्रमाणाचेर सिनेमा उद्योग चलता तरी पूण हांगां ताचो अभ्यासक्रम दिवपी संस्था नात, हें मान्य करपाकूच जाय. पूण लागींच्या राज्यांनी वचून तुमी रीतसर अभ्यास करूंक शकतात. पुण्या, मुंबय, दिल्ली, बंगळुरू, कोलकाता हांगा हो अभ्यास शिकोवपी संस्था आसात. हो अभ्यासक्रम प्रात्यक्षिकाचेर भर दिवपी आसल्या कारणान ज्या सुवातीचेर चित्रपट निर्मिती जाता, थंय तुमचो राबतो आसल्यार चड बरें. तुमी खंयच्याय फाट्यान वचपाक सोदतात तरी तातूंन कितें शिकचे पटडा? हाची म्हायती आदीच घेतल्यार बरी. पुण्या फिल्म इन्स्टिट्यूट, सत्यजित रे चित्रपट संस्था, कोलकाता ह्यो तश्यो प्रसिद्ध संस्था. थंय तुमी प्रवेश घेवन अभ्यासाक सुरवात करूं शकतात. चित्रपट पळयतना अभ्यास म्हूण तो पळोवपाक लागात. तातूंतल्यान तुमकां एक वेगळी नजर येवपाक लागतली. सवंग चित्रपट न पळयता, जे क्लासिक म्हणून वळखतात ते पळयात.
गोंयान कोकणी चित्रपट निर्माण करतात, तांचे कडल्यानूय तुमी म्हायती घेवं शकतात. 1950 सालांत मोगाचो आंवडो ह्या सिनेमान कोकणी सिनेमाचो इतिहास सुरु जालो. त्या उपरांत आमचे नशीब, निर्मोण आयले. हालींच्या तेंपावेले सोल करी, मार्टिन, कांतार तशेच ह्या महोत्सवान दाखयल्ले अर्धो दीस, द वायट ड्रीम, गोंय स्वतंत्रतायेचे होमखंड, विंड चायम्स द वायट शर्ट आनी निमण्या दिसाक हे थळावे भाशेंतले चित्रपट तुमी जरूर पळयात, पूण अभ्यास म्हूण. वागरो ह्या सिनेमाची चर्चा जाल्या. हो सिनेमा कान्स महोत्सवान गेल्लो. हे निर्माते जावं दिगदर्शक, अभिनय करपी तुमकां मेळूं शकतात. तांचे कडल्यान तुमकां ह्या फाट्याची म्हायती मेळूं शकता. चित्रीकरणा पासून ते फिल्म प्रदर्शित जाय मेरेन कितें करचें पडटा, हें सगळें तुमकां कळूं शकता. देशां भितर चड फिल्मां आमच्या भारतान जाता हें खरें. पूण सिनेमाची चड निर्मिती दक्षीणेंत हैदराबाद, चेन्नय सारक्या वाठारांनी आणि मुंबय.
आमकां लागीं मुंबय. कलानगरी म्हण्टकच चडशे जाण मुंबयंक प्राधान्य दितात. रेकॉर्डिंग, डबिंग, स्टुडिओ तशेच चित्रीकरणाक फाव ती सुवात सारक्यो सगळ्यो सुविधा ह्या शारांनी आसात. हैदराबाद तर रामोजींची फिल्मसिटी उबारिल्ली आसा. म्हूण तर लागसारचे उमेदवार ह्या फांट्यांत येवपाक सोदतात, हें अजब न्हय. गोंयांतल्या कायम इफ्फी केंद्राक लागून ना म्हळें तरी वातावरण निर्मिती जाल्या. पूण खंयचेय परिस्थितींत अभ्यास करुनच ह्या फाट्यान वचूंक जाय. चित्रपट आस्वाद सारखो कोर्स तुमी जर पयलींच करश्यात तर ताचो लाव अधिक जातलो. थंय तुमका क्लासिक सिनेमाची वळख तर जातली. खेरीज खंयच्या गजालींचेर आमी भर दिवपाचो, हाची लेगीत म्हायती मेळटा. पूण एक विसरू नाकात. सिनेमा भितर जायते फांटे आसात आनी तुमका आवडटा तोच फांटो घेयात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
