भांगरभूंय | प्रतिनिधी
दिवचल: मूळ कर्नाटकांतल्या, मात फाटल्या कांय दिसां सावन म्हावळींगें, दिवचल हांगा आपल्या घोवाक सोडून 2.7 वर्सां पिरायेच्या सानुल्याक आनी इश्टाक घेवन आयिल्ले बायलेन आपलेच धुवेचो खून केल्ल्याचें उक्तडार आयिल्लें. हातूंत तिका तिच्या इश्टान मजत केल्ली. ह्या प्रकरणांत पुलिसांनी त्या दोगांकूय अटक केल्ली.
मात हे विशीं अदीक पुलीस तपासा वेळार, ह्या खुनाच्या प्रकरणाचो मास्टर मायंड कलेश गंगा धारप्पा (21) हाका दिवचल पुलिसांनी कर्नाटक पुलिसांच्या मजतीन चित्रदुर्ग कर्नाटक हांगा अटक करून दिवचले हाडला. हाका लागून ह्या प्रकरणाच्या तपासाक गती आयल्या.
बेशुद्ध अवस्थेंत हे चलयेक दिवचलच्या सरकारी समाजीक भलायकी केंद्रांत हाडिल्ल्यान हें प्रकरण उक्तें जाल्लें. पुलिसांनी त्या सानुल्याचे आवय वांगडा तिच्या इश्टाकूय ताब्यांत घेतिल्लीं.
सविस्तर प्रकरण
कर्नाटक राज्यांतल्यान एक बायल आपल्या 2.7 वर्सां पिरायेच्या सानुल्याक घेवन आपल्या इश्टा वांगडा फरारी जाली आनी गोंयांत आयली. रावपाक कूड सोदतना म्हावळींगेच्या एकल्यान तांकां रावपाक कूड दिली. ते कुडींत तीं दोगांय जाणां चलये सयत रावतालीं. ते बायलेचो इश्ट लागींचे चिरेखाणीचेर कामाक आशिल्लो.
बुधवारा, 15 ऑक्टोबराक सांजेवेळार ती बायल आनी तिचो इश्ट दिवचलच्यान चलयेक घेवन म्हावळींगे पावलीं. म्हावळींगे शिमेवेले गेटी लागसार पावचे पयलीं तिणें लागींच्या एका दुकानार चलये खातीर उदक घेतलें. उदक पियेवपा खातीर तिणें चलयेक सकयल न्हिदयली. तेन्ना चलयेची कांयच हालचाल दिसनाशिल्ली. हाका लागून म्हावळींगेच्या थळाव्यांक दुबाव आयलो. चली बेशुद्ध अवस्थेंत आशिल्ल्यान थळाव्यांनी ऍम्बुलन्सीक संपर्क केलो. उपरांत ऍम्बुलन्सींतल्यान चलयेक दिवचलच्या सरकारी समाजीक भलायकी केंद्रांत हाडली. थंय तिका तपासली तेन्ना दोतोरांनी तिका मरण आयिल्ल्याचें सांगलें.
ह्या वेळार ते चलयेची आवय आनी तिचो इश्टूय वांगडा आशिल्लीं. ही म्हायती दिवचल पुलिसांक दिली. पुलिसांनी चलयेची कूड पोस्टमार्टमा खातीर जीएमसींत धाडली. उपरांत तिची आवय आनी आवयच्या इश्टाक दुबावीत म्हणून ताब्यांत घेतलीं.
बांबोळे पोस्टमार्टमा उपरांत ते चलयेक घुस्मटून मरण आयिल्ल्याचें स्पश्ट जालें. तशेंच चलयेच्या आंगार खुबशे कडेन बडयेन मारिल्ल्याचे दाग आशिल्ले. आवयच्या इश्टान ते चलयेक बडी घेवन बरेंच बडयिल्ल्याचें समजलें. उपरांत पुलिसांनी हें प्रकरण खुनाचें आशिल्ल्याचें नोंद केलें.
16 ऑक्टोबराक सांजेवेळार दिवचल पुलीस उपअधीक्षक आयपीएस श्रीदेवी, पुलीस निरिक्षक विद्देश शिरोडकार आनी हेर पुलिसांनी म्हावळींगें घडणुक सुवातेर वचून पळोवणी केली.
मास्टरमायंड तिसरोच आशिल्ल्याचें स्पश्ट
ह्या वेळार आवयनूच धुवेचो खून केल्ल्याचें स्पश्ट जाल्लें. मात आतां मुखार केल्ल्या तपासांत मास्टर मायंड तिसरोच आशिल्ल्याचें उक्तें जातांच दिवचल पुलिसांनी तिसर्या आरोपीक कर्नाटकांतल्यान ताब्यांत घेतलो. वरीश्ठ पुलीस अधिकार्यांच्या मार्गदर्शना खाला निरीक्षक विजय राणे आनी ताचो पंगड फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
