भांगरभूंय | प्रतिनिधी
‘क’ श्रेणी कर्मचाऱ्यां खातीर व्हीआरएस
कंत्राटी कामगारांक गुरवारपणा खातीर रजा
पणजी, प्रतिनिधी : येणावळ वाडोवपा खातीर सरकारान म्हारग गाड्यां वेले नोंदणी शुल्क उणें केलां. म्हारग गाडयांची नोंदणी वाडोवन येणावळ वाडची ह्या हेतान हो निर्णय सरकारान घेतला. सरकारी सेवेंत 15 वर्सां पुराय जाल्ल्या कर्मचाऱ्यांक व्हीआरएस घेवपाची मेकळीक दिवपी येवजणेक मंत्रिमंडळान मान्यताय दिल्या.
मंत्रिमंडळ बसके उपरांत मुख्यमंत्री डॉ. प्रमोद सावंत हांणी ही म्हायती दिली. कंत्राटी कर्मचाऱ्यांकूय आतां गुरूवारपणाच्या रजेचो लाव मेळटलो.
ज्या गाडयांचे मोल 6 लाखां परस उणे आसा, तांका 6 टक्के नोंदणी शुल्क भरचें पडटलें. गाडयेचें मोल 6 लाखां परस चड आनी 15 लाखां परस उणें आशिल्ल्यांक 11 टक्के नोंदणी शुल्क भरचें पडटलें. 15 लाख ते 35 लाखां मेरेनच्या गाडयांक 13 टक्के शुल्क आसतलें. 35 लाखां परस चड शुल्क आशिल्ल्या वाहनांक 14 टक्के नोंदणी शुल्क भरचें पडटलें.
‘क’ श्रेणींतल्या कर्मचाऱ्यां खातीर स्वेच्छा निवृत्ती येवजणेक मंत्रिमंडळान मान्यताय दिल्या. कर्मचाऱ्यांनी 15 वर्सांची सेवा पुराय केल्या तांकां हे येवजणे खाला व्हीआरएस घेवपाक मेळटली. कमाची जितलीं वर्सां उरल्यांत त्या वर्सांतल्या दोन म्हयन्यांच्या पगारा प्रमाण तांकां भरपाय मेळटली.
गुरवार आशिल्ल्या सरकारी कर्मचाऱ्यांक इतलो तेंप पगारी रजा मेळटली. आता कंत्राटी कर्मचाऱ्यांक सुद्दा भरपगारी रजा मेळटली. मंत्रिमंडळान हो निर्णय घेतला. गोंय वैजकी म्हाविद्यालय हॉस्पिटलात कंत्राटी पद्दतीन प्राध्यापकांची भरती करपाक मंत्रिमंडळान मान्यताय दिल्या, अशें मुख्मंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
