भांगरभूंय | प्रतिनिधी
निलेश काब्रालः केप्यां जनता दरबारांत लोकांचीं आयकलीं गाराणीं
भांगरभूंय । प्रतिनिधी
केपें: राष्ट्रीय आनी राज्य म्हामार्गाच्या रस्त्याच्या गटारांची देखरेख भौशीक बांदकाम खातें करतलें जाल्यार मेडीआर आनी भितरल्या रस्त्याचें काम हें पंचायत वा पालिका करतलें. हे संबंदांत तांकां भौशीक बांदकाम खात्याचो दाखलो जाय जाल्यार तांकां तो दितले, अशें भौशीक बांदकाम मंत्री निलेश काब्राल हांणी सांगलें. केप्यां दर म्हयन्याक लोकांच्यो समस्या सोडोवपा खातीर जनता दरबार घेतात. ह्या दरबारांत लोकांच्यो समस्या आनी अडचणी समजून घेतले उपरांत ते उलयताले.
ह्या वेळार आमदार एल्टन डिकॉस्टा, उपजिल्होधिकारी शर्मिला गांवकार, मामलेदार प्रताप गांवकार, मुख्याधिकारी मधू नार्वेकार आनी हेर अधिकारी हाजीर आशिल्ले.
ह्या मतदारसंघांत अनुसुचीत जमातीच्या लोकांच्यो कूळ मुंडकार कायद्या संबंदांतल्यो समस्या आसात. त्यो महसूल मंत्र्या कडेन चर्चा करून सोडयतले. तशेंच सरकारी इमारतींचे दुरुस्ती खातीर थेट त्या मुखेल्यान भौशीक बांदकाम खात्यांत पत्रवेव्हार केले उपरांत तांची दुरुस्ती करपाचो विचार आसा. कारण त्या त्या खात्यांतल्या मुखेल्यान ताच्या मुख्य खात्या कडेन पत्रवेव्हार केले उपरांत मुख्य खात्या कडल्यान भौशीक बांदकाम खात्यांत पत्रवेव्हार करपांत खूब वेळ वता. ताका लागून संबंदीत मुखेल्यांनी पत्रवेव्हार केले उपरांत दुरुस्ती करपाचो विचार आसा, अशें काब्राल हांणी सांगलें.
मडगांव ते तिळामळ ह्या रस्त्याच्या कामाचो नियाळ घेतलो. ह्या वेळार अधिकाऱ्यांनी सांगलें, ह्या रस्त्याचें रुंदीकरणाचें काम चालू आसा. केपें पालिका वाठारांत बाजारांतल्या लोकांच्यो कांय कागाळी आशिल्ल्यान कांय कामांक सुरवात करूंक ना, अशें भौशीक बांदकाम खात्याच्या अधिकाऱ्यांनी सांगलें.
खूबशा वाठारांनी खाजराच्या आदारान शेती करपी शेतकारांक उदक मेळना. खारजाची दुरुस्ती करून शेतकारांक वेळार उदकाची पुरवण करची, अशें मंत्री काब्राल हांणी अधिकाऱ्यांक सांगलें.
आबावली वाठारांतल्या शेत जमनी लागसार आशिल्ल्या रस्त्याची राखणे वणटीचें काम सुरू करपाची मागणी विलियम फर्नांडीस हांणी केली. हें काम रोखडेंच हातांत घेतलें, अशें मंत्री काब्रालान ताका उतर दिलें. तशेंच आमोणें वाठारांतल्या रस्त्याचें रुंदीकरण आनी गटारांचो प्रस्न सोडचो, अशी विनवणी दयेश नायक हांणी केली. ताकाय मंत्र्यान ही समस्या बेगिनात बेगीन सोडोवपाचें उतर दिलें. अंतरे देवसा गांवांत अजून लेगीत रस्तो जावंक ना. थंय रस्तो बांदचो अशी मागणी आलिंडा लासेंडा हांणी केली. तेचवरी बार्शे गांवांत लेगीत रस्तो बांदपाची मागणी दत्ता वेळीप हांणी केली.
कामचुकार कंत्राटदार वतले ब्लॅक लिस्टांतः काब्राल
केपेंच्या गांवकारवाड्या वयली पोरणी उदकाची पायपलायन परतून परतून फुट्टा. ती नव्यान घातिल्ले उदकाचे पायपलायनीक जोडची. अशें केल्यार गांवांतलो उदकाचो प्रस्न सुटावो जातलो, अशी मागणी थळाव्या लोकांनी केली. ह्या वेळार मंत्री निलेश काब्राल हांणी अधिकाऱ्यांक थळाव्या लोकांचें हीत पळोवपाचो सल्लो दिलो. तशेंच निविदा मेळून लेगीत हीं कामां करिनात तांचीं नांवां ब्लॅक लिस्टांत घालपाची शिटकावणी मंत्र्यान कंत्राटदारांक दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
