भांगरभूंय | प्रतिनिधी
म्हापसा वॅटरन्सान अखील गोंय वॅटरन क्रिकेट सर्तीचें वस्तादपण जोडलें. ताणें मडगांव वॅटरन्साक पांच विकेटींनी हारयलो. गोवा वॅटरन्स क्रिकेट संघटणे वतीन आयोजीत केल्ले सर्तीची फायनल पर्वरेच्या जीसीए अकादमी मैदानाचेर जाली.
म्हापसा वॅटरन्सान टॉस जिखून मडगांव वॅटरन्साक पयलीं बॅटींग करपाचें आमंत्रण दिलें. आमोद बोरकार (47), संदीप दलाल (36) आनी प्रशांत लोटलीकार (32) हांच्या योगदाना नेटार मडगांव वॅटरन्सान 4 विकेटी वगडावन 141 धांवड्यो केल्यो. ते उपरांत प्रत्युत्तर दितना म्हापसा वॅटरन्साची 3 बाद 20 अशी बिकट परिस्थिती जाली. ते उपरांत दिने्श सावळ (53) आनी बाळकृष्ण मिस्कीन (41) हांणी जबरदस्त बॅटिंगेचें प्रदर्शन घडयतना पंगडाक जैत मेळोवन दिलें.
भारतीय वॅटरन क्रिकेट मंडळाचे उपाध्यक्ष प्रवीण त्यागी, जोड सचीव सुधीर कुलकर्णी, गोंयचे आदले सभापती राजेश पाटणेकार, गोवा वॅटरन क्रिकेट संघटणेचे अध्यक्ष विनोद फडके, हेर पदाधिकारी हे इनामां भेटवण सुवाळ्याक उपस्थीत आशिल्ले.
थोडे भितर धांवतकटोः मडगांव वॅटरन्सः 20 ओव्हरींनी 4 बाद 141 धांवड्यो (आमोद बोरकार 47, संदीप दलाल 36, प्रशांत लोटलीकार 32 धांवड्यो, राजेंद्र दाभोळकार 3-17, शेखर मालवणकार 1-21) हार आड म्हापसा वॅटरन्स, 19.2 ओव्हरींनी 5 बाद 145 धांवड्यो (दिनेश सावळ 53, बाळकृष्ण मिस्कीन 41, परेश मिस्कीन 15 धांवड्यो, शैलेश नायक 2-22, नितीन कालेकार, संदीप दलाल, रिझवान काझी दरेकी 1 विकेट). मॅन ऑफ द मॅचः दिनेश सावळ.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
