भांगरभूंय | प्रतिनिधी
पालिका मंडळाचे बसकेंत थाराव; दुपेटीन दर वाड
भांगरभूंय । प्रतिनिधी
म्हापशें: म्हापशें पालिकेन 2023-24 वर्सा खातीर मार्केट वाठारांतलें पे- पार्कींग शुल्क आनी सोपो करांत वाड करपाचो एकमतान थाराव घेतलो. थारावा प्रमाण हो पे पार्कींग आनी सोपो कराचो दर दुपेट केला.
नगराध्यक्ष प्रिया मिशाल हांचे अध्यक्षते खाला बिरेस्तारा 6 एप्रीलाक पालिका मंडळाची विशेश बसका जाली. ह्या वेळार मुख्याधिकारी अमितेश शिरवयकार, उपनगराध्यक्ष विराज फडके आनी हेर नगरसेवक हाजीर आशिल्ले. जाल्यार नगरसेविका डॉ. नूतन बिचोलकार आनी केल ब्रागांझा गैरहाजीर आशिल्ली.
थारावा प्रमाण मार्केट सोपो करा खातीर दर निश्चीत केले. कोयर कराचोय ह्या सोपो कंत्राट दरांत आस्पाव केला. आदीं विक्रेत्यां कडल्यान कोयर कर पालिका कर्मचारी वसूल करताले. शेडींतल्या विक्रेत्यांक दर चौखण मिटर 40 रुपया जाल्यार शेडी भायल्या विक्रेत्यांक दर चौखणाक 25 रुपया दर आसतलो. सोपो कंत्राटाची बोली निविदा 2 कोटी 42 लाख 24 हजार रुपया आसतली.
तशेंच थारावा प्रमाण मार्केट आनी टॅक्सी स्टॅण्डा वयल्या पे पार्कींग शुल्कांतूय वाड केल्या. दुचाकींक दोन वरां खातीर 10 रुपया, जाल्यार चार चाकींक दोन वरांक 20 रुपया दर आसतलो. आदीं हो दर 5 आनी 10 रुपया आसलो. अंदूं पे पार्कींगची बोली निविदा 1 कोटी रुपया आसतली. मुख्याधिकाऱ्यां कडल्यान रोखडीच ही निविदा जारी करतले, अशें नगराध्यक्ष मिशाळ हांणी सांगलें. मजगतीं, नगरसेवक अॅड. शशांक नार्वेकार हांणी बाजारपेठेच्या शारांत रस्ते आनी फुटपाथांचेर अतिक्रमण करून बसपी अनधिकृत विक्रेत्यांचेर कारवाय करपाची मागणी केली. ह्या विक्रेत्यांक लागून पालिकेक महसूल मेळना. तशेंच मार्केटांतल्या सगळ्या विक्रेत्यांच्या उत्पन्नाचें व्हड लुकसाण जाता. मुख्याधिकाऱ्यान ह्या अतिक्रमणा आड कारवाय करपाची नोटीस जारी केल्या. ते प्रमाण कारवाय जातली, अशी हमी नगराध्यक्षान दिली.
शुक्रार सावन नेमान सोपो वसुलीः नगराध्यक्ष
मार्केटांतल्या पे पार्कींग आनी सोपो कंत्राट 31 मार्च 2023 ह्या दिसा सोंपलां. ते प्रमाण कांय दीस पे पार्कींगचें शुल्क पालिकेन कर्मचाऱ्या वरवीं एकठांय केलें. पूण सोपो कर फाटले स दीस घेवकूच ना. ताका लागून पालिकेच्या महसुलाचेर परिणाम जालो. मुख्याधिकारी तशेंच हेर अधिकारी वर्गान हो प्रकार पालिका मंडळाचे नदरेक हाडून दिवंक नाशिल्ल्यान पालिकेचो महसूल बुडलो. पावत्यो नाशिल्ल्यान वेळार शुल्क घेवपाक मेळूंक ना. पूण शुक्रार सावन आमी कंत्राट दी मेरेन नेमान कर्मचाऱ्यां वरवीं सोपो वसूल करतले, अशी हमी नगराध्यक्ष प्रिया मिशाळ हांणी दिली.
पे पार्किंगेक वेपारी संघटणेचो विरोध
पालिका मंडळाचे पे पार्कींग शुल्क दरवाडीक म्हापशें वेपारी संघटणेन खर विरोध केला. बाजारांत पार्किंगेंत शिस्त आनी गिरायकांक गरजेची सुवात मेळची, हे खातीर संघटणेन पे पार्कींगेक मंजुरी दिल्ली. कारण ही सुवात थलांतरीत विक्रेत्यांनी आडायिल्ली. आदीं पालिकेन नवी पार्कींग सुवात निर्माण करची आनी उपरांतूच शुल्क वाडोवचें. महसूल निर्माण करपाचो आसत जाल्यार पालिकेन आमचे कडेन संपर्क करचो. आमी नव्यो कल्पना दिवपाक शकता, पूण अशे तरेन दर वाड योग्य न्हय, अशें संघटणेन उजवाडायिल्ल्या पत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
