भांगरभूंय | प्रतिनिधी
म्हापशें, प्रतिनिधीः म्हापशें पुलिसांनी टॅनंट व्हॅरिफिकेशन मोहिमे खाला दोन दिसांनी 105 जाणांक अटक केली. सीआरपीसी कलम 41 खाला संबंदितांचेर प्रतिबंधात्मक कारवाय केली.
म्हापशें पुलिसांनी बुधवार 29 आनी बिरेस्तार 30 मे हे दोन दीस टॅनंट व्हॅरिफिकेशन मोहीम हातांत घेतिल्ली. करासवाडो, खोर्ले, मरड आनी काणका ह्या वाठारांनी हें कोम्बींग ऑपरेशन चालीक लायलें. भाड्याक रावपी सगळ्याचें टॅनंट व्हॅरिफिकेशन केलें. तातूंत वट्ट 105 जाणांक ताब्यांत घेतले. ह्या सगळ्या दुबावीत भाडेकारांच्या धनयांनी टेनन्ट व्हॅरिफिकेशन फॉर्म भरून पुलीस स्टेशनांत जमा करूंक नाशिल्लें.
अटक केल्ले सगळे दादले आसात आनी ते मजुरीचें काम करतात. ते मूळ उत्तर प्रदेश, बिहार, पश्चीम बंगाल आनी कर्नाटक ह्या राज्यांतले. सगळ्या दुबावीत भाडेकारांक बार्देस उपजिल्हाधिकार्या मुखार हाजीर केले. उपजिल्हाधिकार्यांनी दुबावितांक समजावन तांकां सोडले.
म्हापशें पुलीस उपअधिक्षक संदेश चोडणकार हांच्या मार्गदर्शना खाला उपनिरिक्षक यशवंत मांद्रेंकार, पंढरी चोपडेंकार, अजय धुरी, विशाल कुट्टीकार, आदित्य गाड, मंगेश पाळणी, अभिजीत नायक, दत्तप्रसाद पंडीत, सहाय्यक उपनिरिक्षक शोभा नायक, हवालदार सुशांत चोपडेंकार, महेश शेटगांवकार, शिवाजी शेटकार आनी हेर कर्मचार्यांनी मोहिमेंत वांटो घेतलो.
मजगतीं, घरांतले कुडींत भाड्याक दवरना पुलीस व्हॅरिफिकेशन फॉर्म भरप कायद्यान सक्तीचें. मात खूबशे जाण ताचे कडेन आडनदर करतात. हे फाटभुंयेर गोंयांत पुलिसांनी ही टॅनंट व्हॅरिफिकेशन मोहीम सध्या हातांत घेतल्या. ज्या घर धनयांनी वयलो कायदो पाळूंक ना अशा लोकांचो अहवाल जिल्हाधिकार्यां कडेन धाडटले, अशी म्हायती पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
