भांगरभूंय | प्रतिनिधी
म्हापशें, प्रतिनिधी : म्हापशेंच्या मार्केटांत जमनी पोंदच्यान लायटीच्या सरयांचें, ट्रान्सफॉर्मर आनी वीजपुरवण वितरण युनिटाचें काम सुरू आसा. गटारांचेर उबारिल्ल्या ह्या ट्रान्सफॉर्मर आनी युनिटाक वेपारी वर्गान हरकत घेतल्या. पावसांत बाजारांत परत हुंवाराची स्थिती निर्माण जावपाची शक्यताय तांणी उक्तायल्या.
वीज खात्यान म्हापशें शारांत स्वस्तीक इन्फ्रा प्रा. लि. (एआयपीएल) ह्या कंत्राटदार कंपनी वतीन जमनी पोंदच्या वीज सरयां वरवीं वीजपुरवण दिवपाचें काम हातांत घेतलां. जमनी पोंदच्यान सरयो घालपाचें काम पुराय जायत आयलां. कामरखाजन, आकय आनी खोर्ले वाठारांतल्या ह्या सरयां वरवीं विजेची पुरवण करता.
कंत्राटदार कंपनीन वेपारी संघटणा आनी पालिका कर्मचार्यां वतीन बाजारपेठेची पळोवणी करून हें युनीट उबारपाचो जागो निश्चीत केल्लो. पळोवणे वेळार गटारांचेर युनीट बसोवंक नाशिल्ल्याची सुचवणी वेपारी संघटणेन केल्ली. तरीय कंपनीन हें युनीट गटारांचेर उबारलें. तशेंच शारांतूय हें युनीट गटारांचेर वयर उबारलां.
हे ट्रान्सफॉर्मर आनी वितरण युनीट चडशे गटारांचेर उबारल्यात. ताका लागून गटारां बंद जाल्यांत. ह्या गटारांतल्यान पावसाचें उदक वचपा खातीर आडखळ निर्माण जावपाची आसा. गटारां बंद जावन पावसांत मार्केटांत हुंवार येवपाचो भंय वेपार्यांनी उक्तायला. तशेंच खुबशे युनीट मार्केटांतल्या दुकानां मुखार स्थापीत केल्यात. ताका लागून ह्या युनिटाक लागून फुडाराक दुकानांक धोको निर्माण जावपाचो भंय कांय दुकानदारांनी उक्तायला.
मजगतीं, हो बाजार पालिकेचो. ताका लागून बाजारांतलीं गटारां आनी दुकानांक ह्या युनिटाचो त्रास जावचो ना, ही जतनाय पालिका मंडळान घेवपाक जाय आशिल्ली. ते प्रमाण बाजारांत युनीट उबारपा विशीं योग्य आराखडो वीज खात्याक विस्वासांत घेवन पालिकेनकरपाक जाय आशिल्लो. पूण जो आराखडो तयार केला ते खातीर पावसांत बाजारांत हुंवार येतलो, असो दावो हांगच्या वेपार्यांनी केला.
हे येवजणे प्रमाण बाजारांत ६८ वीजपुरवण युनीट आनी २७ वीज ट्रन्सफॉर्मर तशेंच मुखेल युनीट उबारतले. सध्या म्हापशें बाजारांत कंत्राटदार कंपनीन वीज ट्रान्सफॉर्मर आनी वांटप युनेट उबारपाचें काम सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
