भांगरभूंय | प्रतिनिधी
म्हापशें, प्रतिनिधी ः हांगाच्या पुलीस स्टेशनाचेर सध्या सहाय्यक उपनिरीक्षक आनी हवालदार कर्मचार्यांचो उणाव जाणवता. खातें बदल्यांचो आदेश दिता. आंकडो अपूर्ण आसून लेगीत हांगा एकूय कर्मचारी बदली जावन येना. ताचे बदला कर्मचार्यांक हेर सुवातेर धाडटत. ह्या पुलीस स्टेशनाक कर्मचार्यांची गरज आसून लेगीत हांगा जाय तसो कर्मचार्यांचो आंकडो कित्याक ना? असो प्रस्न पुलिसांकूच पडला.
म्हापशें हें उत्तर गोंयचें मुखेल पुलीस स्टेशन. पूण कांय वर्सां सावन हांगच्या कर्मचार्यांच्या आंकड्या कडेन आडनदर जाता. बार्देश म्हालांतल्या सात विधानसभा मतदारसंघां मदल्या पांच मतदारसंघांत ह्या पुलीस स्टेशनाचें कार्यक्षेत्र विभागलां. हातूंत म्हापशें आनी हळदोणा हे दोन पुराय मतदारसंघ. उपरांत शिवोले, कळंगुटे, साळगांव मतदारसंघांतलो कांय भाग ह्या पुलीस स्टेशनाच्या वांगडा येता. म्हापशें पुलीस स्टेशनाचें काम पांच आमदारांच्या वाठारांत येवन लेगीत ह्या पुलीस स्टेशनाक कर्मचारी उणे पडटात.
ह्या पुलीस स्टेशनांत पांच सहाय्यक उपनिरीक्षक आसात. तांतल्यो बायलो सहाय्यक उपनिरीक्षक पिंक फोर्सवर सेवा दितात. दोगांची वास्को आनी पेडण्या बदली जाल्या. जाल्यार दोनूय कायम स्वरुपी आसात.
ह्या पुलीस स्टेशनाक १९ हवालदार कर्मचार्यांची गरज आशिल्ल्यान फकत धाच हवालदारांची हांगा नियुक्ती केल्या. तांतल्या दोगांची हेर कडेन बदली जाल्या. जाल्यार दोग जाण कार्यालयाचें काम सांबाळटात. ताका लागून प्रत्यक्ष सहाच हवालदार ह्या पुलीस स्टेशनाचेर सेवा दितात. हवालदार आनी सहाय्यक उपनिरीक्षकांचो उणाव म्हापशें पुलीस स्टेशनाच्या कार्यक्षेत्रातल्या कसारवाडो आनी हळदोण पुलीस चौकेचें कामकाज हवालदार उणे आसूनय सुरू आसा. हळदोण चौकेचें काम एक सहाय्यक उपनिरीक्षक जाल्यार करासवाडो चौकेचें काम पुलीस कॉन्सटेबल सांबाळटा.
पुलीस उपनिरिक्षक रातच्या वेळार ड्युटीचेर आसल्यार सकाळीं सहाय्यक उपनिरिक्षकांचो उणाव आशिल्ल्यान हवालदारांक पुलीस स्टेशनाचें काम पळोवचें पडटा. हळदोण चौकेचो सहाय्यक उपनिरिक्षक सुटयेर गेलो जाल्यार हेय चौकेची जापसालदारकी त्या दिसा पुलीस स्टेशनांत ड्युटी आशिल्ल्या हवालदाराचेर आसता.
हवालदार आनी सहाय्यक उपनिरिक्षकांची बदली करपाचे आदेश पुलीस खातें वेळर जारी करतात. पूण ह्या आदेशा प्रमाण खंयचोच कर्मचारी म्हापाशें पुलीस स्टेशनाचेर धाडिना. कर्मचारी फावो ते नासून लेगीत ह्या सुवातेर आशिल्ल्या कर्मचार्यांची बदली हेर कडेन जाता. हाका लागून पुलीस स्टेशनाचे हवालदार आनी सहाय्यक उपनिरिक्षकांक कामाच्या पेंजा पोंदा दीस काडचे पडटात.
पुलीस कॉन्सटेबल बढतीची वाट पळयतात
२००१ च्या बॉम्बे बॅच क्रमांक ४० चे पुलीस कॉन्सटेबल बढतीची वाट पळयतात. ह्या कर्मचार्यांचे बढतीची प्रक्रिया पुलीस खात्यान पुराय केल्या. ह्या कर्मचार्यांक बढती मेळ्ळ्यार पुलीस हवालदारांचो आंकडो वाडटलो. खात्यान बढती आदेश जारी करून, कर्मचारी म्हापशें पुलीस स्टेशनाचेर धाडून ही समस्या सोडोवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
