भांगरभूंय | प्रतिनिधी
आसा तशीच स्थिती राखपाचो कामगार आयुक्तांचो आदेश
म्हापशें: म्हापशें पालिकेच्या कर्मचाऱ्यांच्या चार्टर ऑफ डिमांड मागणीपत्रा संबंदी कायदेशीर सल्लो घेवपा खातीर कामगार आयुक्तांनी एका म्हयन्याची मुजत दिल्या. तशेंच आसा तशीच स्थिती राखची (स्टेटस् स्को मेन्टेन) अशे निर्देशूय पालिका मंडळाक दिल्यात.
काल (बुधवारा) सकाळीं कामगार आयुक्त राजू गांवस हांचे मुखार म्हापशें पालिका कर्मचाऱ्यांच्या मागणीपत्राचेर सुनावणी जाली. पालिके वतीन नगराध्यक्षा शुभांगी वायंगणकार, उपनगराध्यक्ष चंद्रशेखर बेनकार, मुख्याधिकारी अमितेश शिरवयकार, नगरसेवक विराज फडके आनी आशिर्वाद खोर्जुंवेंकार जाल्यार पालिका कर्मचारी संघटणे वतीन अखील गोंय अध्यक्ष केशव प्रभू, पदाधिकारी तायो गडेकार, म्हापशें पालिका कर्मचारी संघटणेचे पदाधिकारी शेखर गांवस, अजीत होबळे आनी रमेश राव हाजीर आशिल्ले.
पालिकेन ह्या मागणीपत्राचेर कायदो तज्ञांचो सल्लो घेवपाचो निर्णय 31 ऑक्टोबर दिसा जाल्ले पालिका मंडळाचे बसकेंत घेतला. ताका लागून हो सल्लो घेवपा खातीर एका म्हयन्याची मुजत दिवची अशी विनंती पालिके वतीन केल्या. हे मुजतीक कामगार आयुक्त राजू गांवस हांणी मंजुरी दिल्या.
तेच बरोबर कर्मचाऱ्यांचेर कसलीच कारवाय करिनासतना आसा तशीच स्थिती राखची असो आदेशूय कामगार आयुक्त गांवस हांणी पालिकेक दिला आनी फुडली सुनावणी 12 डिसेंबर दिसा निश्चीत केल्या.
मजगतीं, कर्मचारी संघटणेन फाटल्या 21 सप्टेंबर दिसा 19 कलमी मागणीपत्राची नोटीस दिल्ली. हाचेर सहाय्यक कामगार आयुक्त मिलिंद गोवेकार हांचे मुखार दोन फावटी सुनावणी जाल्ली. पयले सुनावणे वेळार पालिकेक निर्णय घेवपा खातीर 10 दिसांची मुजत दिल्ली. हे मुजतींत निर्णय घेनासतना 31 ऑक्टोबर दिसा पालिका मंडळाची बसका आपयिल्ली.
ताका लागून 20 ऑक्टोबर दिसा जाल्ले सुनावणे वेळार पालिका मंडळाचो निशेध करून मागण्यांचे पुर्तताये खातीर 21 वेर संपाचो उलो मारिल्लो. त्या दिसा कर्मचारी संघटणेचे पदाधिकारी आनी पालिका मंडळांत समजिकायेची चर्चा जावन संप फाटीं घेतिल्लो. उपरांत पालिका मुख्याधिकाऱ्यांनी संघटणेच्या तीन पदाधिकाऱ्यांक कारणां दाखय नोटीस दिवन कोयर व्हरपी वाहनाचें लुकसाण केल्ल्याच्या आरोपा खाला पुलिसां वतीन अनवळखी कर्मचाऱ्यांचेर गुन्यांव नोंद केल्लो.
जाल्यार 31 ऑक्टोबर दिसा जाल्ले पालिका मंडळाचे बसकेंत मागणीपत्राचेर कायदेशीर सल्लो घेवचो असो सगल्यांचे संमतीन थाराव मंजूर केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
