भांगरभूंय | प्रतिनिधी
नगराध्यक्ष, मुख्याधिकारी, कर्मचारी काळखांत; नगरविकास खात्यान दखल घेवपाची गरज
भांगरभूंय । प्रतिनिधी
म्हापशें: म्हापशें पालिकेंत प्रशासकीय कारभाराचो गोंदळ चालूच आसा. नगरसेवकांक स्थायी समितीचें इतिवृतांत दिवपाची परंपरा लेगीत सध्याच्या पालिका मंडळान खंडीत केल्या. कर्मचारी ते मुख्याधिकारी, नगराध्यक्ष आनी पालिका मंडळ हें प्रशासकीय कामकाजा विशीं नेणार आशिल्ल्यान लोकांचे हाल जातात.
पालिका मंडळाचे स्थायी समितीन पालिकेच्या विकासकामांक अर्थीक मंजुरी दिली जाल्यार ती कंत्राटदारांचीं बिलां मंजुरे खातीर परतून स्थायी समिती कडेन वचपाची गरज ना. कारण आदींच तांकां अर्थीक मंजुरी दिल्ली आसता, पूण ही फायल पालिकेच्या अभियांत्रिकी विभागान स्थायी समिती मुखार दवरपाक जाय. त्या कामाक मंजुरी दिल्या काय ना, तें कोणाकूच खबर आसना. कारण कोणाकूच स्थायी समितीचे बसकेचो इतिवृत्तांत समितीच्या वांगड्यांक वा नगरसेवकांक मेळना.
म्हापशें पालिकेंत लोकनियुक्त पालिका मंडळाचे स्थापने सावन स्थायी समितीचे इतिवृत्तांत नगरसेवकांक दिवपाची प्रथा आसा. इतलीं वर्सां ही प्रथा चालू आशिल्ली, ती सध्याच्या पालिका मंडळान बंद केल्या. कारण डिलींग हॅण्ड सयत, कर्मचारी तशेंच नगरसेवक, नगराध्यक्ष आनी पालिकाधिकाऱ्यांक पालिकेचो प्रशासकीय कारभार खबर ना. स्थायी समितीन कसलो निर्णय घेतला, काय थाराव घेनासतना आपल्याक जाय तें इतिवृत्तांत बरयलां तें कशें कळटलें? हे पारदर्शक प्रक्रिये खातीरूच इतिवृत्तांत दरेका नगरसेवकाक दिवपाचो नेम आसा. म्हापशें पालिकेचे लोकनियुक्त नगराध्यक्ष जयराम सिरसाट हांचे पासून ते फाटल्या पालिका मंडळा मेरेन ही प्रथा चालू आशिल्ली. पूण सध्याच्या पालिका मंडळान ही प्रथा बंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
