भांगरभूंय | प्रतिनिधी
कर वसुलींत पालिका मंडळाचो हस्तक्षेप; कांय म्हयन्यां सावन वसुली बंद पडिल्ल्यांत जमा
भांगरभूंय । प्रतिनिधी
म्हापशें: व्होट बँकेचे आशेन म्हापशें पालिका मंडळ थाकबाकीदार वेवसायिकांक सदळसाण दिवन पालिकेचे कारवायेंत हस्तक्षेप करपाक लागल्यात. हाचो थेट परिणाम पालिकेच्या महसुलाचेर जाला. महसूल नाशिल्ल्यान पालिका अर्थीक संकश्टांत सांपडल्या.
मेळिल्ले म्हायती प्रमाण पालिकेंत कायमस्वरुपी आनी दिसवड्याचेर मेळून सुमार 400 कर्मचारी आसात. त्या कर्मचाऱ्यांचो म्हयन्याच्या पगार 1.35 कोटी रुपया जाता आनी तो पालिकेचे तिजोरेंतल्यान खर्च करचो पडटा. हो पयसो पालिकेक वेगवेगळ्या करांच्या रुपांत मेळटा, पूण सध्या हो महसूल मेळोवपांत खूबश्यो आडखळी निर्माण जाल्यात.
मसहूल एकठांय करपांतली मुख्य आडखळ म्हणल्यार कर बुडोवपी थकबाकीदार वेवसायिकांत पालिका मंडळांतले कांय नगरसेवका कडल्यान मेळपी तेंको. हे नगरसेवक थकबाकीदारां आड पालिका अधिकारी आनी कर्मचाऱ्यांक सलीच कारवाय करपाक दिनात. एकाद्या वेवसायिकान थकबाकी दवरल्यार आनी तो वेवसायीक नोटीस जारी करून लेगीत थकीत रक्कम भरिना जाल्यार ताच्या दुकानाक कुलप मारपाची कारवाय पालिका अधिकारी करताले. पूण सध्या पालिका मंडळ अशी कसलीच कारवाय पालिका अधिकाऱ्यांक करपाक दिनात. कर बुडोवपी वेवसायिकांक अभय दिवपीचे हे पालिका मंडळाचे वृत्तीक लागून पालिकेक महसूल मेळना. तशेंच नगरसेवकांच्या आशिर्वादाक लागून वेवसायीक लेगीत आपलो कर वेळार जमा करिनात. ह्या एकंदर प्रकाराक लागून फाटल्या कांय म्हयन्यां सावन पालिकेची महसूल वसुली बंद पडिल्ल्यांत जमा आसा.
पालिका कर्मचाऱ्यांच्या म्हयन्याच्या पगाराचेर 1.35 कोटी रुपया तिजोरेंतल्यान काडचे पडटात. पूण फावोसो महसूल तिजोरेंत जमा जाय नाशिल्ल्यान सध्या पालिकेक कसो बसो पगाराचो आंकडो मेळोवचो पडटा. म्हयन्याक जो महसूल मेळटा, तो सगळो पालिका कर्मचाऱ्यांच्या पगाराचेर खर्च जाता. कसल्या आपत्कालीन वा अर्थीक संकश्टाक फुडो करचे खातीर कर्मचारी राखीव निधी फंड दवरतात. पूण पालिकेन हो पगार राखीव निधी लेगीत वापरला. नेमा प्रमाण ह्या निधींतली जितली रक्कम काडटात, तितलीच रक्कम निश्चीत मुजतींत परतून जमा (रिकूप)
करूंक ना.
सध्याच्या पालिका मंडळाक लेगीत फुडारांत पालिकेचेर व्हड संकश्ट येतलें हाची जाणीव आसा. पूण व्होट बँक सांबाळपा खातीर पालिकेचो महसूल बुडोवपाचें सत्र तांणी चलयला. ते भायर पालिका वाठारांतल्या बेकायदो वेवसायांक तेंको दितात. हे वेवसाय कायदेशीर करून तातूंत पालिकेचो महसूल वाडचो अशेय यत्न पालिका मंडळा कडल्यान जायनात. कांय अधिकारी आनी कर्मचारी लेगीत पालिका मंडळाक ह्या वावरांत आदार करतात. लोकांचीं कामां वेळार करिनासतना तांकां बेकायदो गजालींचो आदार घेवपाक लायतात. पालिका मंडळान कर बुडयतल्यांक भोगशी नासतना, तशेंच कर्मचारी वर्गाक कर वसुलीची मोख (टार्गेट) दिवन कर वसुलीचेर सक्तीचो निर्णय घेतलो ना जाल्यार घडये फुडल्या एक दोन म्हयन्यांत पालिका खाकनवाळ जावपाची शक्यताय अधिकारी वर्गान उक्तायल्या.
थकबाकीदारांचेर नगरसेवकांचो आशिर्वाद…
सध्याचें पालिका मंडळ व्होट बँक सांबाळपा खातीर कर बुडयतात त्या वेवसायिकांचेर कारवाय करपाक दिनात. ही व्होट बँक नाराज जाली जाल्यार आपलो राजकी फुडार संकश्टांत सांपडटलो, असो भंय नगरसेवकांक सतायता. ताका लागून अशा मतदारांक पालिके वतीन कसलोच त्रास जावचो न्हय हे खातीर नगरसेवकांचो खटाटोप सुरू आसा. थकबाकीदारांचेर कारवाय करचे आदीं आमकां कशोवचें, असो आदेशूच ह्या नगरसेवकांनी पालिका अधिकाऱ्याक दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
