भांगरभूंय | प्रतिनिधी
16 जाणां बदला तिनूच कर्मचारी सांबाळटात काम
भांगरभूंय । प्रतिनिधी
म्हापशें: म्हापशेंच्या डिटेंशन सेंटरांतल्या पुलिसांची मोपा इमिग्रेशन फांट्यांत बदली केल्ल्यान ह्या केंद्रांत कर्मचाऱ्यांचो उणाव आसा. फक्त तिनूच पुलीस कर्मचारी केंद्रांतल्या विदेशी नागरिकांचे टेळणीची सेवा दितात. केंद्राच्या अदीक कर्मचाऱ्यांचे मागणे कडेन पुलीस खात्यान आडनदर केल्या.
मेळिल्ले म्हायती प्रमाण गोंयांत बेकायदो तरेन राबितो करपी विदेशी नागरिकांक धरून तांकां मायदेशांत धाडिमेरेन नदरकैदेंत दवरचे खातीर हें डिटेंशन सेंटर उबारलां. सेंटरांत येवपी विदेशी नागरिकांचेर लक्ष दवरचे खातीर तीन उपनिरिक्षक, पांच महिला सहाय्यक उपनिरिक्षक, एक हवालदार, चार कॉन्स्टेबल आनी तीन महिला कॉन्स्टेबल असो पुलिशेचो फौजफाटो ह्या सेंटरांत नेमिल्लो.
ह्या पुलीस कर्मचाऱ्यां मदले एक उपनिरिक्षक, दोन सहाय्यक उपनिरिक्षक, हवालदार आनी एक कॉन्स्टेबल ह्या पांच जाणांची इमिग्रेशन फांट्यांत बदली केली. जाल्यार एक उपनिरिक्षक सेवा निवृत्त जालो. एक सहाय्यक उपनिरिक्षक रजेर आसा. गंभीर दुयेंसाचेर उपचार घेवपी युगांडाचे महिला कैदे खातीर हॉस्पिटलांत तीन महिला कॉन्स्टेबल गार्ड ड्युटीचेर आसात. जाल्यार एक उपनिरिक्षक आनी दोन सहाय्यक उपनिरिक्षक सद्दा स्टेशन हावस ऑफिसर म्हूण सेवा दितात. ताका लागून उरिल्ल्या तीन पुलीस कॉन्स्टेबलांक कैद्यांचेर नदर दवरची पडटा. ते 12- 12 वरां सेवा दितात. सध्या केंद्रांत 8 विदेशी कैदी आसात. उण्या कर्मचाऱ्यांक लागून ह्या कैद्यांची टेळणी करपाची जापसालदारकी लेगीत एकाच पुलिसाचेर आसा. डिटेंशन सेंटरांत दाखल केल्ले खूबशे विदेशी नागरीक नाराज आसतात. ताका लागून खूब खेपे ते सेंटरांत बोवाळ मारतात. ताका लागून सेंटरांत गरजेच्या कर्मचाऱ्यांचो समतोल दवरप गरजेचें आसतनाय ह्या सेंटरा कडेन पुलीस खातें तशेंच सरकारान आडनदर केल्या. रित्या जाल्ल्या सुवातांचेर कर्मचारी धाडपाची केंद्राची मागणीची पुर्तता लेगीत पुलीस खात्या कडेन अजून जावंक ना. ताका लागून सध्या उरिल्ल्या कर्मचाऱ्यांचेर ताण आयला, अशी म्हायती सुत्रां कडल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
