भांगरभूंय | प्रतिनिधी
केंद्रीय मंत्री गजेंद्र सिंह शेखावत हांची घेतलों भेट
सुभाष शिरोडकार हांचें सांगणें
फोंडें: म्हादय प्रस्नाचेर गोंय सरकाराची बाजू भक्कम आसा. सर्वोच्च न्यायालय निश्चीतपणान गोंयची बाजू स्विकारून योग्य न्याय दितलें असो विस्वास आसा. म्हादय प्रस्नाचेर अदीक चर्चा करपा खातीर बिरेस्तारा सकाळीं मध्य प्रदेशांत केंद्रीय उदका स्रोत मंत्री गजेंद्र सिंह शेखावत हांची भेट घेतलों अशें उदका स्रोत मंत्री सुभाष शिरोडकार हांणी सांगलें.
धाटफार्म-मोल्यां उदका स्रोत खात्या वतीन चार कोटी रुपया खर्च करून बांदतल्या बंधाऱ्याचो बुन्यादी फातर बसोवपाचे कार्यावळींत मंत्री सुभाष शिरोडकार उलयताले.
ह्या वेळार आमदार गणेश गांवकार, उदका स्रोत खात्याचे वरिश्ठ अधिकारी कृष्णकांत पाटील, मोलें पंचायतीचे सरपंच कपील नायक, शिगांव पंचायतीचे सरपंच गोविंद शिगांवकार, थळावे पंच विठोबा मळेकार आनी हेर पंच वांगडी माचयेर हाजीर आशिल्ले.
लोकांनी वेंचून दिल्ल्या लोकप्रतिनिधींनी विकास कामां करपाचो छंद बाळगूंक जाय. पुर्वजांनी राखून दवरिल्ले जागेचो योग्य वापर करपाचो यत्न तरणाटे पिळगेन करूंक जाय. ह्या वर्सा गोंयांतल्या तीन हजार तरणाट्यांक शेती वेवसायांत देंवोवपाचो यत्न करतले अशें सुभाष शिरोडकार हांणी सांगलें.
सांवड्डें मतदारसंघांतल्या विवीध सुवातींनी बांदिल्ले बंधारे थळाव्यां सयत हेर लोकांक उपेगी थारत आसात. गोंयांत मुख्यमंत्री डॉ. प्रमोद सावंत हांच्या फुडारपणा खाला खूबशे म्हत्वाचे प्रकल्प लोकां खातीर म्हत्वाचे थारत आशिल्ल्याचें आमदार गणेश गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
