भांगरभूंय | प्रतिनिधी
भांगरभूंय । प्रतिनिधी
पर्वरीः लोकवस्ती तशेंच मार्केट आनी शाळा आशिल्ल्या वाठारांत मोबायल टॉवर उबारपाक नेरूलच्या लोकांनी खर विरोध केला. इंडस टॉवर कंपनी वतीन टॉवर उबारतात ते सुवातेर लोकांनी बुधवारा सकाळीं जमून तो उबारपाक आडमेळे हाडिल्ल्यान वातावरणात तणाव तयार जालो.
थळावो आमदार केदार नायक हांका ही खबर मेळटकूच तांणी बार्देशाचो मामलेदार राजाराम परब आनी पर्वरी पुलीस स्टेशनांतल्या पुलीस अधिकाऱ्यां वागंडा घडणुकेचे सुवातेर येवून टॉवर बांदपी कंपनीच्या प्रतिनिधी कडेन उलोवणी केलीं. मोबायल टॉवरांतल्या किरणोर्सगाक लागून आमचे भलायकेक धोको उप्रासतलो अशें लोकांनी केदार नायक हांका सांगलें.
टॉवर उबारतात त्या वाठारांत मार्केट आनी शाळा आसा. भुरग्यांकूय ह्या टॉवरा पसून धोको आसा ताका लागून आमी हो टॉवर कसोच उबारपाक दिवचे नात. कंपनीक तो दुसरे कडेन व्हरपाक सांगचें अशें लोकांनी सांगलें. लोकांक विस्वासांत घेनास्तना टॉवर बांदपाचें काम चल्लां. टॉबर काडून व्हेलो ना जाल्यार खर आंदोलन करपाची शिटकावणी लोकांनी दिल्या. लोकांक नाका जाल्यार टॉवर उबारचो न्हय. हांव लोकां वांगडा आसतलो अशें केदार नायक हांणी ह्या वेळार सांगलें.
जेन्ना टॉवर उबारपाक ब्युनाद खणताले तेन्ना ट्यूब बांय बांदतात अशें लोकांक सांगल्लें, प्रत्यक्षांत मात इंडस टॉवर कंपनीन मोबायल टॉवर उबारलो अशें लोकांचें म्हणणे आसा. लोकांचें म्हणणे कंपनीच्या वरिश्ठ अधिकाऱ्यांच्याक कानार घालपाचें उतर कंपनीच्या प्रतिनिधीनी दिलां अशें केदार नायक हांणी सांगलें. टॉवर काडून व्हरपाक कंपनीक सांगपाक आपल्याक अधिकार ना. मात कंपनीच्या अधिकाऱ्यां कडेन उलोवन तोडगो काडपाचे यत्न करतलों अशें मामलेदार परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
