भांगरभूंय | प्रतिनिधी
एकल्याक अटक; 11 मोबायल फोन जप्त
भांगरभूंय । प्रतिनिधी
मुरगांवः बिगर गोंयकार मोबायल चोरांनी उत्तर गोंयांत धुमशेण कांडले उपरांत आतां तांणी आपली मोहीम दक्षीण गोंयांत सुरू केल्या.
बोटींग, स्कुबा डायवींग आनी न्हांवपा खातीर वास्को बायणा दर्यादेगेर व्हड संख्येन पर्यटक आयल्यात. तातूंतल्या एका पर्यटकाचो मोबायल चोरयेक गेल्ल्याचें कळ्ळां. हे चोरये प्रकरणांत बायणा दर्यादेगेर आशिल्ल्या पर्यटकांनी मोबायल चोरयेक गेल्ल्याची कागाळ मुरगांव पुलीस स्टेशनाचेर नोंद केल्या.
पुलिसांनी ताकतिकेन चोरयेक गेल्लो मोबायल ट्रेस केलो आनी मोबायल चोराक वास्को एफएल गोम्स रस्त्या वयलय्न ताब्यांत घेतलो. पुलिसांनी दुबावीत मोबायल चोर मोहम्मद युसूफ हुसेन शेख हाची अदीक चवकशी केली तेन्ना ताचे कडल्यान सुमार तीन लाखांचे आनीक 10 मोबायल जप्त केले. पुलिसांनी आरोपी कडल्यान 11 मोबायल जप्त केल्यात.
गोंय गृह विभागान नव्या वर्सांत बिगर गोंयकार मोबायल चोरांक धरून तांचे कडल्यान लाखांनी रुपयांचे मोबायल फोन जप्त केल्यात.
शुक्रारा 6 जानेवारीक वास्को बायणा दर्यादेगेर देशी पर्यटक आयिल्लो. तांच्या मदल्या एका पर्यटकाचो मोबायल चोरयेक गेल्ल्याचें कळटाच ताणें चोरी प्रकरणांत मुरगांव पुलीस स्टेशनाचेर कागाळ दाखल केली. ह्या चोरी प्रकरणांत पुलिसांनी दावणगिरी कर्नाटकांतल्या मोहम्मद युसूफ हुसेन शेख (47) हाका मोबायल फोना सयत ताब्यांत घेतला. ताका वास्कोच्या प्रथम श्रेणी न्यायालयांत हाजीर केलो तेन्ना तीन तीन दिसांची पुलीस कोठडी फर्मायली. मोबायल चोरी प्रकरणांत मुरगांव पुलीस स्टेशनाचे निरिक्षक राघोबा कामत हांच्या मार्गदर्शना खाला पुलीस उपनिरिक्षक स्टेनली गोम्स फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
