भांगरभूंय | प्रतिनिधी
पणजीः देशांत नव्यान सुरू केल्ल्या विमानतळां मदलीं पांच विमानतळां सध्या लुकसाणेंत चलतात. हुस्क्याची गजाल म्हणल्यार गोंयांतलें मोपाचें मनोहर आंतरराष्ट्रीय विमानतळ सगळ्यांत चड लुकसाणेंत आसा. जाल्यार सिंधुदुर्गाचो चिपी विमानतळूय लुकसाणेंत आसा. नागरी उड्डाण राज्यमंत्री जन. डॉ. व्ही के सिंग हांणी लोकसभेंत लेखी जापेंत ही म्हायती दिली.
सिंधुर्गाचो चिपी विमानतळ सेगीत तिसऱ्या वर्साय लुकसाणेंत चलता. जाल्यार गोंयांतल्या मोपा विमानतळाचो 2022- 23 त लुकसाणेचो आंकडो देशांतल्या पांच मुखेल विमानतळां मदीं सगळ्यांत चड आसा.
मोपाच्या मनोहर आंतरराष्ट्रीय विमानतळाक 148.34 कोटी लुकसाण जालां. पोरूं डिसेंबरांत सुरू जाल्ल्या ह्या विमानतळान जानेवारी 2023 सावन विमान सेवा सुरू केल्ली. 2312 एकरांचेर बांदिल्ल्या मनोहर आंतरराष्ट्रीय विमानतळाक 2,870 कोटी रुपया खर्च जाला. सिंधुदुर्गांतल्या विमानतळाक 2020-21 त 20.37 कोटी, 2021-22 त 22.49 कोटी आनी 2022-23 त 40.20 कोटी रुपया लुकसाण जालां. हो विमानतळ 2019 वर्सा सुरू जाल्लो. ह्या विमानतळा खातीर सुमार 800 कोटी रुपया खर्च जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
