भांगरभूंय | प्रतिनिधी
प्रदर्शन, भलायकी शिबिरां, नितळसाण मोहिमेचोय आस्पाव
भांगरभूंय I प्रतिनिधी
पणजी : प्रधानमंत्री नरेंद्र मोदी हांच्या वाडदिसा निमतान 17 सप्टेंबर ते 2 ऑक्टोबर ह्या काळांत देशभरा सयत गोंयातूय सेवा कार्याच्या माध्यमांतल्यान विवीध कार्यावळींचें आयोजन केलां. राज्यांत भलायकी आनी पर्यावरण अशा दोन विभागांत 17 कार्यावळींचें आयोजन करतले, अशी म्हायती भाजप प्रदेशाध्यक्ष सदानंद शेट तानावडे हांणी पत्रकार परिशदेंत दिली. ह्या वेळार तांचे वांगडा आदले खासदार अॅड. नरेंद्र सावयकार, दामू नायक, भाजप युवा मोर्चाचे अध्यक्ष समीर मांद्रेंकार हाजीर आशिल्ले.
प्रधानमंत्री नरेंद्र मोदी हांचो वाडदीस 17 सप्टेंबराक देशभर मनयतले. ते निमतान फुडले 16 दीस आयोजीत कार्यावळीं खातीर राज्य पांवड्यार नेमिल्ल्या समितीच्या समन्वयकपदार नरेंद्र सावयकार हांणी नेमणूक करतले.
दामू नायक समितीचे सहसमन्वयक आसतले. समितींत आमदार दाजी साळकार, समीर मांद्रेंकार, आरती बांदोडकार, प्रभाकर गांवकार आनी रुपेश कामत ह्या पांच जाणांचो आस्पाव आसा, अशें तानावडे हांणी म्हणलें.
उत्तर गोंया खातीर नेमिल्ले समितीचे समन्वयकपदार आदले आमदार सिद्धार्थ कुंकळ्येंकार आसतले. तांच्या फुडारपणा खाला महानंद अस्नोडकार, राजसिंग राणे, सुभाष मळीक, निहारिका मांद्रेंकार, प्रशांत देसाय आनी डॉ. शेखर साळकार कार्यावळी येसस्वी करतले.
दक्षीण गोंयांत सर्वानंद भगत हांच्या फुडारपणा खाला तुळशीदास नायक, शर्मद रायतूरकार, सुरेश केपेंकार, अनिता कवळेंकार, दीपक नायक आनी डॉ. स्नेहा भागवत कार्यावळींचें आयोजन करतले.
भलायकी शिबिरां, रक्तदान शिबिरां, टीबी दुयेंतींक मजत तशेंच कोवीड वासिनीकरण, नितळसाण मोहीम राबयतले, अशें तानावडे हांणी सांगलें.
दीनदयाळ उपाध्याय, महात्मा गांधी जयंतीय मनयतले
25 सप्टेंबराक दीनदयाळ उपाध्याय आनी 2 ऑक्टोबराक महात्मा गांधी हांचे जयंती निमतान प्रदेश भाजपान विवीध कार्यावळी आयोजीत केल्यात. राज्यभरांतले भाजप कार्यकर्ते कार्यावळींच्या तयारेक लागल्यात, अशें सदानंद तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
