भांगरभूंय | प्रतिनिधी
अर्दकुटे म्हायतीच्या आदाराचेर दिल्यात बातम्यो: शाबुद्दीन
म्हापशें: बोडगेश्वर मैदानार आयोजीत केल्ल्या मोग्रीप सुपरक्रॉस चॅम्पियनशीप सर्तींत अपघात जावन अफ्ताबआलम हसन लाडजी (20, घोगळ-मडगांव) हाका आयिल्ल्या मरण प्रकरणांत म्हापशें पुलिसांनी आयोजक श्याम कोठारी (मुकूंद नगर, पुणें) हाका अटक केली. उपरांत न्यायालयान दुबाविताची जामिनाचेर सुटका केली.
हो अपघात आयतारा 13 वेर सकाळीं 11.30 वरांच्या सुमाराक घडिल्लो. सर्तीच्या थळार रेस ट्रॅकार कसरत करतना मयत स्पर्धक लाडजी हाचो मोटारसायकली वयलो ताबो वचून तो सकयल पडिल्लो आनी फाटल्यान आयिल्ल्या दोन दुचाकींचो ताका धपको बशिल्लो. ह्या अपघातांत गंभीर जखमी जाल्ले लाडजीक उपचारा वेळार गोमॅकाँत मरण आयिल्लें.
ह्या प्रकरणांत सोमारा पुलिसांनी निश्काळजीपणा आनी सदोश मनीसवधाच्या आरोपा खाला दुबावीत आरोपी श्याम कोठारी आनी मोग्रीप सुपरक्रॉस चॅम्पियनशीपाच्या हेर वांगडी आयोजकां आड भादंसंच्या 336, 304 अ आनी 34 कलमा खाला गुन्यांव दाखल केल्लो.
पुलिसांनी ह्या गुन्यांवा खाला दुबावीत श्याम कोठारीक मंगळारा सकाळीं अटक केली. उपरांत म्हापशेंच्या पयलो वर्ग न्यायालयान 10 हजारांची हमी आनी तितलेच रकमेच्या हमिदाराच्या आदारान ताची जामिनार सुटका केली. फुडलो तपास पुलीस करतात.
मजगतीं, मंगळारा सांजवेळा मयताचो भाव आनी ताच्या इश्ट परिवारान म्हापशेंचे पुलीस निरिक्षक परेश नायक हांची भेट घेवन आपली बाजू मांडली.
मयताचो भाव शाबुद्दीन सय्यदान म्हणलें, कांय माध्यमांनी अर्दकुटे म्हायतीच्या आदाराचेर बातम्यो दिल्यात. अफ्ताबाक मरण हें गोमॅकाँत उपचार सुरू आसतना आयलें. पूण कांय चुकीच्या बातम्यांक लागून ह्या प्रकरणाची दिशाभूल जावंक शकता.
हो रेस ट्रॅक वेवस्थीत आशिल्लो काय ना, ही आमची जबाबदारी न्हय. तो प्रस्न आयोजकांचो. आमचीं कागदपत्रां सारकीं आशिल्लीं म्हणून सर्तींत आमकां वांटो घेवपाक परवानगी मेळ्ळी. चुकीचे म्हायतीक लागून आमची केस न्यायालयांतल्यान भायर पडची न्हय. तशेंच कुटुंबांक योग्य विमो मेळचो ही आमची अपेक्षा आसा अशें सय्यद हांणी म्हणलें.
तशेंच ह्या प्रकरणांत काँग्रेसी वतीन उत्तर गोंय जिल्हो अध्यक्ष विरेंद्र शिरोडकार, म्हणयारे संजय बर्डे आनी अॅड. शशांक नार्वेंकार हांणी म्हापशें पुलिसांक निवेदन भेटयलां. हो इव्हेंट शेत जमनींत आयोजीत केल्लो. ताका लागून शेतांत मातयेचो भराव घालपा पसून ताका परवानगी दिवप्यांचेर कारवाय करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
