भांगरभूंय | प्रतिनिधी
भांगरभूंय खबरांमेज
पणजी ः मुख्यमंत्री डॉ. प्रमोद सावंत हांणी आयज पणजेच्या पर्यटन भवनांत घडोवन हाडिल्ले कार्यावळींत शाळा आनी महाविद्यालयां खातीर तयार केल्ल्या ‘Together Agile – टुगेदर एजायल’ (शिकवणी आनी शिक्षणांत आत्मनिर्भर गोंय) ह्या राष्ट्रीय शिक्षणीक धोरण संक्रमण मार्गदर्शिकेचें विमोचन केलें. हें पुस्तक ग्रोथ अॅण्ड डेव्हलपमेंट प्लॅटफॉर्म (जीडीपी) फावंडेशनान प्रकाशीत केलां आनी तें फावंडेशनाचे वेवस्थापकीय विश्वस्त किशोर एम. शाह हांणी बरयलां आनी अग्रलेखन लेफ्टनंट जनरल डॉ. माधुरी कानिटकर (सेवानिवृत्त) हांणी केलां.
शिक्षण सचीव रवी धवन, मुख्यमंत्र्यांचे सचीव अजित रॉय, उच्च शिक्षण संचालक प्रसाद लोलयेंकार, शिक्षण संचालक शैलेश झिंगडे, राज्य शिक्षणीक संशोधन आनी प्रशिक्षण मंडळाचे संचालक नागराज होन्नेकरी, सहयोगी प्राध्यापक गोपाल प्रधान ह्या वेळार हाजीर आशिल्ले.
ह्या वेळार उलयतना मुख्यमंत्री डाॅ. प्रमोद सावंत हांणी मुळाव्या शिक्षणा सावन राष्ट्रीय शिक्षणीक धोरणाची अंमलबजावणी करून गोंयान शिक्षणाच्या मळार एक पावल मुखार मारलां म्हणपाचें सांगलें.
‘टूगेदर AGILE’ मार्गदर्शिका पुस्तकाक लागून सगल्या शिक्षणीक संस्थांक राष्ट्रीय शिक्षणीक धोरणाची अंमलबजावणी करपाक आनी राष्ट्रीय शिक्षणीक धोरणा प्रमाण मुखार कशें वचप हें जाणून घेवपाक मजत जातली अशें तांणी सांगलें.
राष्ट्रीय शिक्षणीक धोरण समानता, गुणवत्ता, तांक आनी जबाबदारी ह्या मुळाव्या आदाराचेर तयार केलां. हें पुस्तक गोंयांतल्या सगल्या शिक्षण संस्थांनी पावतलें हाची शिक्षण संचालकांनी जबाबदारी घेवची. उच्च शिक्षणांत राष्ट्रीय शिक्षणीक धोरणाची कशी अंमलबजावणी करप हाचें नियोजन सरकार ह्या वर्सा करतलें. सगल्या संबंदितांक विस्वासांत घेवन कृती आराखडो तयार करतले अशेंय तांणी सांगलें.
विश्वस्त अॅड. अमेय सलत्री हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
