भांगरभूंय | प्रतिनिधी
भांगरभूंय । प्रतिनिधी
पणजी : मुंडकार खटले निकालात काडपाची प्रकिया नेटान चालू आसा. 2 वर्सांत 2845 खटल्यांतले 2323 खटले निकालात काडल्यात. नवे अर्ज येत आशिल्ल्यान सध्या 2408 खटले पडून आसात. तीन सुनावण्यांनी मुंडकार खटले निकालात काडटात. हाका लागून मुंडकारांनी भिवपाची गरज ना, अशें मुख्यमंत्री डॉ. प्रमोद सावंत हांणी सभाघरांत सांगलें.
मुंडकारांनी बेगिनात बेगीन अर्ज करचें. सुनावणी घेवन डिसेंबर 2026 मेरेन सगळे अर्ज निकालात काडटले, अशें मुख्यमंत्र्यांनी चर्चे वेळार सांगलें.
मुंडकार कायद्या खाला मुंडकारांचे खटले बेगिनात बेगीन निकालात काडपा खातीर खास यंत्रणा तयार करची, अशी मागणी करपी खासगी प्रस्ताव आमदार जीत आरोलकार हांणी सभाघरांत मांडलो. ह्या प्रस्तावाचेर खूब वेळ चर्चा जाली. मुख्यमंत्री डॉ. प्रमोद सावंत हांच्या आस्वासना उपरांत जीत आरोलकार हांणी हो प्रस्ताव फाटीं घेतलो.
आमदार उल्हास नायक तुयेकार, डॉ. चंद्रकांत शेट्ये, विरेश बोरकार, डिलायला लोबो, मायकल लोबो, आलेक्स रेजिनाल्ड, निलेश काब्राल, निलेश काब्राल हांचीं भाशणां जालीं.
महसूल मंत्री बाबूश मोन्सेरात हांणी मुंडकार खटल्यांचे स्थितीची म्हायती दिली.
मुंडकार कायद्यांत बदल वा दुरुस्ती करपाची गरज ना. मुंडकार खटले निकालात काडपा खातीर सराकारान खासा मामलेदारांची नेमणूक केल्या. तशेंच शेनवारा लेगीत सुनावण्यो जातात. नवे अर्ज येत आसात, हाका लागून पडून उरिल्ल्या अर्जांचो आंकडो वाडत आसा. पंचायत वाठारांत 300 मिटर जाल्यार नगरपालिका वाठारांत 200 मिटराची जमीन मुंडकारांक घरा खातीर दिवपाची तजवीज कायद्यांत आसा, अशें मुख्यमंत्र्यांनी सांगलें.
कायद्या प्रमाण मुंडकाराच्या मूळ घराकूच मान्यताय मेळटली. कांय जाणांनी दोन वा तीन घरां बांदल्यात. हेर घरांक मान्यताय मेळची ना, अशें मुख्यमंत्र्यांनी सांगलें.
सगळ्या आमदारांक मुंडकार कायद्याची प्रत दिवची, अशी सुचोवणी शेतकी मंत्री रवी नायक हांणी केली.
मुंडकारांक कायद्या प्रमाण 300 चौखण मिटर जमीन मेळटा. कांय मुंडकार भाटकारा कडेन तडजोड करून 500 वा 700 चौखण मिटर जमीन मेळोवपाचो यत्न करता. हाका लागून तो अर्ज करपाक पळय ना, अशें मायकल लोबो हांणी सांगलें.
कांय मुंडकार लेगीत भाटकारां कडेन दादागिरी करतात. भाटकाराक ते जमनीचेर येवपाक दिनात, अश्यो देखी आमदार आलेक्स रेजिनाल्ड हांणी सांगल्यो.
‘शौचालया खातीर भाटकाराची एनओसी नाका’
घरा सावन 5 मिटरांच्या वाठारांत शौचालया खातीर भाटकाराच्या नाहरकत दाखल्याची गरज ना. तशेंच रस्त्या सावन घरा मेरेन देड मिटरची पायवाट सोडची पडटली. खटले निकालात काडटना पायवाट सोडपाचो उल्लेख करचो, असो आदेश मामलेदारांक दितां. मुंडकारांच्या घरांक वीज, उदक आनी शौचालय आसपा खातीरची तजवीज कायद्यांत आसा, अशें मुख्यमंत्री डॉ. प्रमोद सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
