भांगरभूंय | प्रतिनिधी
पणजी: गोवा कोंकणी अकादेमी आयोजीत दोन दिसांचें 23 वें युवा कोंकणी साहित्य संमेलन अंदू वर्सा मिरामारच्या व्ही. एम्. साळगांवकार कायदो महाविद्यालयाच्या जोड पालवान घडोवन हाडटात. 17 फेब्रुवारीक सकाळीं 10 वरांचेर तेलंगणची साहित्यीक मर्सी मागरिट ही संमेलनाचे उद्घाटन करतली.
ह्या वेळार गोंय विद्यापिठाच्या शणै गोंयबाब भाशा आनी साहित्य महाशाळेचे सहाय्यक प्राध्यापक, युवा लेखक डॉ. हेमंत बाळकृष्ण अय्या हांकां मेघश्याम नायक यादस्तीक ‘युवा साहित्य पुरस्कार’ भेटयतले. डॉ. अय्या हांचो कथाकार (कथा संग्रह), पोकळ (कविता संग्रह), कांय कन्फ्युज्ड कविता (कविता संग्रह) पुस्तकां प्रकाशीत जाल्यात. तांणी 50 परस चड पथनाट्य बरयल्यात आनी गोंयच्या विवीध वाठारांनी सादर केल्यात. ‘मोगा म्हज्या’ ह्या कोंकणी गितांच्या आल्बमाक 2016 वर्साचो उत्कृश्ट गीत लेखनाचो पुरस्कार तांकां फावो जाला. तांच्या एकंदरीत कार्याची दखल घेवन गोवा कोंकणी अकादेमीन अंदू वर्सा खातीरच्या ‘युवा साहित्य पुरस्कारा’ खातीर तांची निवड केल्या.
संमेलनाध्यक्ष म्हूण अन्वेषा सिंगबाळ, येवकाराध्यक्ष म्हूण ज्ञानेश्वर पेडणेंकार आनी कार्याध्यक्ष म्हूण सहाय्यक प्राध्यापक मेघना कापडी हांची निवड जाल्या. उक्तावण सुवाळ्या वेळार सारिका नायक हांचो वर्साच्या जैतिवंत सर्तकांच्या साहित्यकृतींचो झेलो गोवा कोंकणी अकादेमी लोकार्पण करतली. तशेंच ‘पडवेर’ ह्या सत्रांत उर्वशी नायक आनी आकाश गांवकार हीं साहित्यीक तुकाराम शेट आनी ज्योती कुंकळकार हांची मुलाखत घेतलीं, अकादेमीचे संशोधन सहाय्यक दत्तराज उर्फ दत्तू नायक आनी सहाय्यक प्राध्यापक पुर्वा वस्त हीं युवा साहित्य पुरस्कार जैतिवंत डॉ. हेमंत अय्या हांची मुलाखत घेतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
